Kaspii qubyr konsortsiýmyndaǵy bolǵan aqaýǵa bailanysty eshbir munaishy jumystan qysqarmaidy. Ortalyq kommýnikatsiialar qyzmetinde ótken brifingide QR Energetika ministri Bolat Aqsholaqov osylai málim etti, dep habarlaidy QazAqparat.
«Kaspii qubyr konsortsiýmynda jumys toqtap qalǵan kúnde jumysshylardyń taǵdyry ne bolatyny týraly mynany aita alamyn. Qarashyǵanaq, Qashaǵan, Teńiz siiaqty kez kelgen úlken jobada josparly aialdaý degen uǵym bolady. Kenishtiń kólemine bailanysty eki jylda nemese úsh jylda bir ret jumys aialdaýy múmkin. Keibir názik toraptardyń jumysy jyl saiyn bir ret toqtatylýy múmkin. Biraq kenishtegi jumystyń túgeldei toqtaýy jospar boiynsha úsh jylda bir ret qana bolady. Onyń merzimi qalypty jaǵdaida 30 kúnnen 60 kúnge deiin barýy múmkin. Eshkim bul kezde eshbir jumysshysyn shyǵaryp tastamaidy. Bári shtattyq rejimde jumys istei beredi. Sondyqtan Kaspii qubyr konsortsiýmyndaǵy jaǵdai ailyqtyń, jumysshylardyń qysqartylýyna ákeledi deýge múlde negiz joq. Óitkeni bul kenishter úshin shtattyq apat desek bolady. Iaǵni, bul kenishtegi tehnikalyq aialdaýlardyń shegindegi jaǵdai», -dedi vedomstvo basshysy
Aitýynsha, búginge deiin eshbir munai kompaniiasy qalyptasqan jaǵdaidy alǵa tartyp, jumysshylardy qysqartý týraly bastama kótermegen.
«Eger kenish bir jyl boiy jumyssyz tursa, másele basqa. Biraq biz shekteýler týraly aityp otyrmyz. Bul tutas toqtatý emes. 3 aptanyń ishinde jóndeimiz dep otyr. Tipti ár ailaqqa 3 aptadan ketti degenniń ózinde 2 aidan aspaýy kerek. Bul aralyqta eshkim eshkimdi jumystan bosatqaly jatqan joq. Bul másele turaqty baqylaýda. Tiisti oblys ákimderimen de sóilesip otyrmyz. Kásiporyndardyń eshqaisysy qyzmetkerlerin jumystan bosatý týraly áńgime kótergen joq», - dedi ministr.
