Áleýmettik jelide teńiz jaǵasynda otyrǵan áiel beinelengen video keńinen tarady. Jeli qoldanýshylary ony Kaspiidegi qaiǵyly oqiǵamen bailanystyryp, kadrdaǵy áieldi qaza tapqan sarbazdardyń biriniń anasy dep jazǵan. Video keibir BAQ-ta da osy sipatta jariialandy. Alaida roliktiń Qazaqstanǵa eshqandai qatysy joq, dep habarlaidy ult.kz.
Videonyń túpnusqa avtory onyń qaida jáne qashan túsirilgenin jazǵan. Avtordyń aitýynsha, kadrlar Marokkonyń Tanjer qalasynda túsirilgen.
«Sálemetsiz be. Iá, keshe videony synaq retinde jariialap, uiyqtap qalǵan edim. Tańerteń qarasam, pikirler men reposttar óte kóp eken. Video Marokkoda, Tanjer qalasynda túsirildi. Kadrdaǵy áiel — Aljirden kelgen qyz. Videomnyń Qazaqstan aýditoriiasyna qalai tarap ketkenin ózim de bilmeimin. Qazaqstandaǵy jańalyqtardan habarsyz edim, ol jaqta eshqashan bolǵan emespin. Sarbazdaryńyzǵa qatysty jaǵdaiǵa qatty qaiǵyryp otyrmyn. Kóńil aitamyn», — dep jaýap berdi video avtory.
Qaiǵyly oqiǵalar kezinde emotsiialyq videolar men eski nemese basqa elderde túsirilgen kadrlar konteksten julynyp, tez taraýy múmkin. Eske salaiyq, 24 qyrkúiekte Kaspii teńizinde «Hazar Qorǵany – 2026» oqý-jattyǵýy kezinde aýa raiynyń kúrt nasharlaýynan 14 áskeri qyzmetshini teńiz aǵysy alyp ketken. Buǵan deiin «qaza bolǵan sarbazdyń ákesimen sońǵy ret sóilesken videosy» degen aqparatty tekserip, videodaǵy áskeri qyzmetshiniń tiri ekeni aqparat quraldarynda aityldy. Muny sarbazdyń ákesi Talǵat Qulmanovtyń ózi de rastady.
Sondai-aq Qorǵanys ministri Dáýren Qosanovtyń videosy Kaspiidegi qaiǵyly oqiǵamen bailanystyrylyp taratylǵan. Qorǵanys ministrligi kadrlardyń byltyr túsirilgenin jáne qazirgi jaǵdaiǵa qatysy joq ekenin málimdedi. Budan bólek, áleýmettik jelide eski videolar, jasandy intellekt kómegimen jasalǵan materialdar jáne qazaqstandyq blogerlerge qarsy manipýliatsiialyq jazbalar taraǵan.
Aita keteiik, jalǵan aqparatqa qarsy is-qimyl ortalyǵy kórineý jalǵan aqparat taratqany úshin qylmystyq jaýapkershilik qarastyrylǵanyn eske saldy. Qylmystyq kodekstiń 274-babyna sáikes, onlain-platformalar arqyly mundai aqparatty taratqany úshin úsh jylǵa deiin, al aýyr zardaptarǵa ákep soqqan jaǵdaida bes jylǵa deiin bas bostandyǵynan aiyrý jazasy qoldanylýy múmkin.
