Kaspii teńizindegi áskeri oqý-jattyǵý kezinde 17 áskeri qyzmetshiniń sýǵa ketip, 14-iniń qaza bolýyna bailanysty áleýmettik jelide Ainar Ahmetov pen Áli Maǵaýiiaǵa qatysty túrli aqparat taraǵan edi. Olardyń týystary sarbazdardyń qaida ekenine alańdap, mán-jaidy anyqtaýdy suraǵan, dep habarlaidy ult.kz.
Osydan keiin Qorǵanys ministrligi eki matrostyń videoúndeýin jariialady.
Áli Maǵaýiianyń aitýynsha, 24 qyrkúiekte ol Kaspii teńizine shyqpaǵan. Ol jaǵalaýda bolyp, ózine berilgen teńiz jaǵalaýyn kúzetý mindetin oryndaǵan.
«Kemege mingen joqpyn. Ózime berilgen mindetti oryndadym», – dedi áskeri qyzmetshi. Ol sol kúni ata-anasymen telefon arqyly sóilesip, jaǵdaiynyń jaqsy ekenin aitqanyn jetkizdi.
Ainar Ahmetov te 24 qyrkúiekte jaǵalaýda bolǵanyn jáne kemege otyrmaǵanyn málimdedi. Ol oqiǵadan keiin úidegilermen bailanysyp, óziniń aman ekenin habarlaǵan.
Qorǵanys ministrligi eki matrostyń teńizge ketken 17 áskeri qyzmetshiniń quramynda bolmaǵanyn túsindirdi. Vedomstvonyń málimetinshe, oqý-jattyǵý kezinde jeke quramnyń barlyǵy birdei teńizde bolmaǵan. Áskeri qyzmetshilerge jeke oqý mindetteri berilip, Ahmetov pen Maǵaýiia óz tapsyrmalaryn jaǵalaýda oryndaǵan. Qazir eki sarbaz da áskeri bólimde qyzmetin jalǵastyryp júr.
Bul túsinikteme alǵashqy aqparattaǵy qaishylyqtardan keiin berildi. 24 qyrkúiekte Qorǵanys ministrligi bastapqyda Kaspiige 19 áskeri qyzmetshini alyp ketkenin habarlaǵan. Keiin Úkimettik komissiia ashyq teńizge 17 áskeri qyzmetshiniń ketkenin naqtylady. Izdestirý-qutqarý jumystarynyń nátijesinde úsh sarbaz aman qalyp, 14 áskeri qyzmetshi qaza tapty.
Aita keteiik, jelide professor Dámetken Súleimenova Batys Qazaqstan oblysynyń týmasy Ainar Ashatuly Ahmetovty izdep málimdeme jasaǵan edi.
Sonymen qatar, memleket basshysy Áskeri reforma josparyn ázirleýdi tapsyrdy.
