Parlament Cenaty mobildi aýdarymdarǵa qatysty salyq zańnamasyna túzetýler engizdi. Osyǵan bailanysty jelide mobildi aýdarymdarǵa qatysty túrli aqparat, sonyń ishinde odan bas tartý týraly jazbalar paida boldy.
Kaspi Bank zańǵa qatysty jii qoiylatyn suraqtarǵa jaýap berdi, dep habarlaidy Sputnik Qazaqstan agenttigi.
Men jeke tulǵamyn. Meniń mobildi aqsha aýdarymym týraly derekter salyq organyna berile me?
Joq. Bank qupiiasyn saqtaý talaptaryna sáikes sizdiń aqsha aýdarymyńyz týraly derekter salyq organdaryna berilmeidi. Siz burynǵydai jeke maqsatyńyz úshin aqsha aýdara alasyz jáne qabyldai alasyz.
Jalpyǵa birdei deklaratsiialaýdy kezeńmen engizý týraly zańǵa sáikes kásipkerlik qyzmetti júrgizý belgileriniń bary týraly málimetter tek 2025 jyldan bastap beriletini kózdelip otyr. 2025 jylǵa deiin jeke kásipker emes jáne memlekettik qyzmetshi emes jeke tulǵalar úshin eshteńe ózgermeidi.
Mobildi aqsha aýdarymyna shekteý qoiyla ma nemese salyq salyna ma?
Joq. Jeke tulǵalardyń arasyndaǵy aqsha aýdarymyna salyq salynbaidy. Zań jobasynda aqsha aýdarymyna jańa salyqtyń nemese shekteýdiń paida bolatyny kózdelmegen.
Eger kásipker klientterden mobildi aqsha aýdarymyn alatyn bolsa, ol úshin kóterińki salyq tóleýi kerek pe?
Joq. Zań jobasynda jańa salyqtyń paida bolatyny kózdelmegen.
Kásipkerlik maqsatta mobildi aqsha aýdarymyn paidalaný qazirdiń ózinde satýshylardy el zańnamasyna sai salyq tóleý jáne fiskaldyq chek berý mindetinen bosatpaitynyn atap ótemiz.
Men jeke kásipker ne kompaniia basshysymyn. Meniń mobildi aqsha aýdarymym týraly derekter salyq organyna berile me?
Jalpyǵa birdei deklaratsiialaýdy kezeńmen engizý týraly zańǵa sáikes jeke kásipkerge ne kompaniia basshysyna tiesili shottar boiynsha kásipkerlik qyzmetti júrgizý belgileriniń bary týraly málimetter 2024 jyldan bastap beriletini kózdelip otyr.
Endeshe bul zań jobasy ne týraly?
Zań jobasy jeke tulǵalardyń arasyndaǵy mobildi aqsha aýdarymyna qatysty emes.
Mobildi tólemder uǵymyn jáne jeke kásipker men zańdy tulǵalar úshin taýarlar nemese qyzmet kórsetý úshin aqyny arnaiy kásipkerlik qyzmetke arnalǵan shottarǵa qabyldaý mindetin engizý kózdelip otyr.
Mysaly, muny taýarlar men qyzmet kórsetý úshin aqy qabyldaýǵa Kaspi Pay mobildi qosymshasy men Kaspi QR-dyń kómegimen qazirdiń ózinde jasaýǵa bolady.
Mobildi aýdarymdardy kóleńkeden shyǵarý
25 qarashada parlament senaty kásipkerlerdi mobildi aýdarymdar úshin jeke shot ashýǵa mindetteitin zańdy qabyldap, prezidenttiń qol qoiýyna joldady.
Qarjy jáne biýdjet komitetiniń múshesi Ǵumar Dúisembaevtyń aitýynsha, pandemiia kezinde shaǵyn jáne orta kásipkerler mobildi aýdarymdardy búkil jerde paidalana bastady. Alaida ol tek jeke tulǵalar arasyndaǵy tranzaktsiialarǵa arnalǵan.
Bul máseleni zańnamalyq retteý maqsatynda "mobildi tólemder" túsinigi engizildi.
Sonymen qatar kásipkerler bizneske arnap jeke shot ashýǵa mindetteledi. Klientter de alǵan taýardyń nemese kórsetilgen qyzmet aqysyn tólegende, aqshany osy shotqa aýdarady. Bankter tiisti málimetterdi memlekettik kirister organdaryna beredi.
Budan bólek, zańǵa sáikes, mobildik tólemder arqyly taýarlar men qyzmetterge aqy tóleý úshin esep aiyrysý kezinde onlain-baqylaý-kassa mashinalaryn qoldaný zańdastyrylady.
