28 qazanda tańerteń halyq arasynda tanymal Kaspi Bank qosymshasy ashylmai, áleýmettik jelide kóptegen adamdar tólem jasaýda qiyndyqqa ushyraǵanyn jazdy. Keibir qoldanýshylar qosymshada kórinip turatyn aqshasynyń joǵalyp ketkenin jazsa, keibiri qosymsha arqyly aqsha tólei almaǵanyna shaǵymdandy.
Zau Zahan esimdi qoldanýshy Facebook jelisinde "Talǵar trassasy boiynda dúrligý. "Baýyr, nómirińdi qaldyrshy, Kaspi qosyla sala salyp jiberem, aqsha joq" dep taksistke jalynǵan jurt. "Ońaiy" barlar eńsemizdi tik kóterip, avtobýsqa otyryp ketip jattyq" dep jazdy.
Jelide bank qosymshasyna kibershabýyl jasalýy múmkin degen sybys ta tarap úlgerdi.
Kaspi Bank kiber shabýyl boldy degen aqparatty joqqa shyǵaryp, tehnikalyq aqaý bolǵanyn habarlady. Mekeme sonyń kesirinen keibir klientterdiń aqshasy durys kórsetpei turǵanyn da rastady.
"Kaspi.kz qosymshasynda tehnikalyq aqaý boldy. Sonyń kesirinen klientterdiń esepshottaryndaǵy aqsha durys kórsetpei tur. Ókinishke qarai, kartamen tóleý, aqsha alý jáne bankomat arqyly aqsha toltyrý, tólem jasaý men aqsha aýdarý operatsiialary ýaqytsha istemei tur. Kompaniia máseleni tezirek sheshýge tyrysyp jatyr" delingen bank habarlamasynda.
Qarjy mekemesi áleýmettik jelilerde kibershabýyl jasaldy degen aqparat taraǵanyn alǵa tartyp "kibershabýyl bolǵan joq, klientter aqshasy óz ornynda. Qosymsha túzelgennen keiin klientter aqshasy durys kórsetiletin bolady" dep habarlady.
Qazan aiynyń basynda eldegi ekinshi deńgeili bankterdiń biri Alfa-bank te tehnikalyq aqaýdyń kesirinen internet arqyly qarjy operatsiialaryn júrgizý múmkin emestigin aityp, máseleni joiýǵa kúsh salatynyn habarlaǵan.
