Qazaqstandyqtardyń aqsha aýdarymdaryn tekserý máselesi áli talqylanyp jatyr. Bul týraly búgin ulttyq bank tóraǵasy Erbolat Dosaev málimdedi, dep habarlaidy "Ult aqparat".
"Qarjy ministrligi Kaspi bank arqyly jasalatyn aqsha aýdarymdaryna salyq salady dep oilamaimyn. Tek osy tólemderden salyq tólenip-tólenbegenin kórip otyrǵysy keledi. Bul máseleni Ulttyq bank pen Qarjy ministrligi birlesip qarap jatyr. Qolma-qol aqshasyz tólem jasaý kólemi ulǵaisa, biýdjetke túsetin kiris te artýy kerek dep oilaimyn. Bul - qalypty nárse, sebebi aqsha kóleńkeli ekonomikadan shyǵady", - dedi Dosaev jýrnalisterge bergen suhbatynda.
Ol bul másele tek Kaspi bankke ǵana emes, búkil bank sektoryna qatysty ekenin qadap aitty.
"Kóleńkeli ekonomikanyń úlesin azaitý baǵytyndaǵy birlesken jumys qosymsha tabys alý túrindegi oń nátijelermen jalǵasqanyn qalaimyz. Bul ázirge Qarjy ministrliginiń usynysy ǵana, bank qaýymdastyǵymen talqylanyp jatyr", - dedi Ulttyq bank tóraǵasy.
Buǵan deiin Qarjy ministrligi salyqtan jaltarǵan kásipkerlerdi anyqtaý úshin aqshalai aýdarymdar tekseriletinin málimdegen edi.
Qarjy vitse-ministri Rýslan Eńsebaevtyń aitýynsha, qazirgi ýaqytta Kaspi Gold - tólem jasaýdyń eń jii qoldanylatyn túri. Alaida tólem júiesi salyq zańnamasynyń talabyna sai emes.
Vedomstvo basynda Kaspi.kz arqyly aýdarym jasaýǵa tyiym salýdy oilapty. Biraq, bul el ekonomikasyna keri áserin tigizýi múmkin degen paiymǵa kelgen.
