Qaskeleń turǵyndary qalanyń ortalyq kóshelerinde ótken kókparǵa narazy boldy. Ulttyq oiynǵa qatysýshylar jarys kezinde kólikterge zaqym keltirgen, - dep habarlaidy Tengrinews.kz tilshisi.
Áleýmettik jelilerde ótken demalys kúnderi Qaskeleń qalasynda ótken kókpardyń videolary tarady. Kadrlardan qatysýshylar jol boiynda kókpar tartyp júrgenin kórýge bolady. Qala turǵyndary shabandozdardyń "shabýylynan" qorqyp, narazy bolyp jatyr.
Kýágerlerdiń aitýynsha, shabandozdar turaqqa qoiylǵan kólikterdi búldirgen: jylqylar kólikterdiń kei jerin maiystyryp, syzattar qaldyrǵan. Jergilikti turǵyndar kókpardaǵy kóptegen oiynshy oqiǵany telefonǵa túsirýge tyiym salyp, tipti qorqytqanyn aitady.
Politsiia oqiǵanyń mán-jaiyn anyqtap jatqanyn aitty.
"Mamyrdyń 15-inde bir top shabandoz Qaskeleń kóshelerinde kókpar oiynyn uiymdastyrdy. Kókpar aýdan ákimdigimen kelisilmegen. At oiynyna qatysqan shabandozdardyń qimyly qalanyń birneshe kóshesinde bolǵan. Bul derek Qarasai aýdandyq politsiia bóliminde resmi tirkeldi", - dedi Almaty oblysy politsiia departamentiniń baspasóz qyzmetindegiler.
Tártip saqshylarynyń aitýynsha, aýdandyq politsiiaǵa kókparshylar kóligin búldirgen 34 jastaǵy turǵyn aryz túsirgen.
"Qazirgi ýaqytta oiyndy uiymdastyrýshy men oǵan qatysýshylardy anyqtaý boiynsha jedel izdestirý sharalary júrgizilip jatyr, olar mindetti túrde jaýapqa tartylady", - deidi tártip saqshylary.
