Almatyda QR Densaýlyq saqtaý ministri Eljan Birtanov baspasóz máslihaty barysynda Qaskeleń qalasyndaǵy juqpaly aýrýlar aýrýhanasynyń jaǵdaiy týraly aitty, dep habarlaidy QazAqparat tilshisi.
Ministr Qaskeleń aýrýhanasynyń jaǵdaiyn nashar dep baǵalady.
«Qaskeleń qalasyndaǵy aýrýhananyń jaǵdaiy nashar. Men qazir quzyrly organdarǵa Qaskeleń juqpaly aýrýlar aýrýhanasyn jaýyp, Qaskeleń ortalyq aýrýhanasyna qosý týraly arnaiy tapsyra berip jatyrmyn. Ortalyq aýrýhanada arnaiy qosymsha ǵimarat bar. Ǵimarat jańa. Óte aýyr naýqastar Almatyǵa nemese Taldyqorǵanǵa tasymaldanatyn bolady», - dedi ministr Eljan Birtanov.
Búgin ministr bastaǵan delegatsiia Almaty men Almaty oblysyndaǵy juqpaly aýrýlar aýrýhanasyn aralaǵan bolatyn. Ministr ár mekemeniń jumysyn baǵalap, materialdy-tehnikalyq ahýalyn tekserdi.
Aita ketý kerek, Qaskeleń juqpaly aýrýlar aýrýhanasynyń múshkil jaǵdaiy týraly patsientter áleýmettik jelide jariialaǵan bolatyn.
Olar syry túsip qalǵan qabyrǵalar, tasy synǵan edenderdiń sýretin kórsetken bolatyn.
Ministrdiń aitýynsha, búgingi tańda respýblika boiynsha 59 adam meningokokk juqpasyn juqtyrǵan.
Respýblika boiynsha meningokokk juqpasynan 13 adam kóz jumǵan.
Almatyda 5 adam kóz jumdy. Olardyń 2-eýi - 5 jasqa deiingi balalar. Eki balanyń anasy aýrýdyń alǵashqy belgileri bastalǵanda jekemenshik emhanadaǵy ózderiniń jeke dárigerlerinen keńes alǵany belgili boldy.
Syrqattanǵandardyń biri - 27 jastaǵy órt sóndirýshi Oljas Súleimenovtyń aýrýy nebári 12 saǵattyń ishinde asqynyp, kenetten kóz jumǵan.
Jalpy, Almaty oblysynda 4 adam kóz jumdy.
