Almaty oblysynyń Shonjy aýylynda «Batyr babalardy ulyqtaý paryzy» atty ǵylymi konferentsiia ótti. Jiyn barysynda eldi mekenderdiń qazaq halqyna jat ataýlarynan arylý máselesi kóterildi, dep habarlaidy QazAqparat tilshisi.
Sh. Ýálihanov atyndaǵy tarih jáne etnologiia institýty, Uiǵyr aýdanynyń ákimi jáne «Álmerek baba» qorynyń uiymdastyrýymen ótken sharaǵa ǵalymdar, tarihshylar, qoǵam qairatkerleri jáne jergilikti turǵyndar qatysty.
«Almaty oblysyndaǵy birqatar eldi mekenderdiń ataýyn ózgertý kerek. Tarihshylar osyndai bastama kóterýde. Máselen, Qaskeleń, Shamalǵan, Muqyry, Shonjy, Boraldai. Bul ataýlardyń túp-tamyryna úńilsek, qalmaq, jońǵar batyr-qońtaishylarynyń esimderi. Shapqynshylyq kezinde qazaq dalasynda qaza tapqan qalmaq batyrlarynyń esimin jaýdyń mysyn basý úshin ádeii qoiǵan. Elbasynyń «Bolashaqqa baǵdar: rýhani jańǵyrý» maqalasy endi osy olqylyqtardyń ornyn toltyrýdyń bir joly», - deidi ǵylymi konferentsiiaǵa qatysqan tarihshylar.
"Jońǵar batyrynyń atymen atalyp ketken eldi mekenniń biri - Uiǵyr aýdanynyń ortalyǵy. Jergilikti halyqtyń ózi bul ataýǵa asa kóp mán bere bermeidi. Al tarihshylar Shonjynyń qazaqtyń Álmerek batyry qolynan qaza tapqanyn alǵa tartady. Sondyqtan tarihty zerdelep,muraǵatty aqtaryp, dál osyndai ataýlardan arylsaq, Jetisý jeri ǵana emes, tutas qazaq jeri rýhani jańǵyrar edi deidi", - Sh. Ýálihanov atyndaǵy tarih jáne etnologiia institýty direktorynyń qoǵammen bailanys jónindegi orynbasary Áýezhan Shashaev.
Tarihshynyń aitýynsha, tarihi sanamyzdy qalpyna keltirýdi qarjymen, qandai-da bir materialdyq ólshemmen ólsheýge bolmaidy. Sondyqtan sanamyzǵa sińgen osyndai óreskel qatelikterdi túzeýimiz kerek. "Sonda ǵana biz ózimizdiń táýelsizdigimizdi saqtap, bolashaq urpaǵymyzǵa osy elimizdiń tizginin bere alamyz", - deidi ol.
Tarihshylardyń bastamasyn saiasattanýshylar da, azamattyq qoǵam ókilderi de qoldap otyr. Biraq bul máselege jan-jaqty daiyndalyp, jiti tarazylap, kirisý kerektigin alǵa tartady. Qalmaq batyrlarynyń esiminen bólek el men jerge jat ataýlar áli de kóp. Patshalyq Resei jáne Keńes dáýirinen qalǵan aýyl attary ózgergenimen, eskishe atalyp júrgen eldi mekender de joq emes. «Sondyqtan sanany jańǵyrtpai, bolashaqty baǵdarlaý da ońaiǵa soqpas», - deidi ǵalymdar.
