Qazaqstandyq kásipqoi boksshy Jánibek Álimhanuly (2-0-0,1KO) Amerikadaǵy alǵashqy jekpe-jeginde kolýmbiialyq boksshymen judyryqtasady, dep habarlaidy "Ult aqparat".
Boksshynyń PR-menedjeri Berik Sultannyń habarlaýynsha, otandasymyz kásipqoi ringtegi úshinshi jekpe-jegin 28 qyrkúiek kúni Amerikanyń Kaliforniia shtaty Oklend qalasynda ótkizedi. Jánibektiń qarsylasy - kolýmbiialyq Karlos Galvan.
Aita keteiik, Karlos Galvan 2011 jyly 30 qyrkúiekte alǵash kásipqoi ringke shyǵyp, jalpy 24 kezdesý ótkizgen. 27 jasar boksshy kásipqoi ringte 16 ret jeńiske jetip, 15 qarsylasyn nokaýtqa jibergen, 7 jekpe-jekte jeńilip, 1 ret teń túsken.
Eske salaiyq, Jánibek Álimhanuly ústimizdegi jyldyń qańtar aiynda QR ulttyq quramasyndaǵy mansabynyń aiaqtalǵanyn jariialaǵan bolatyn. Keiinnen kásipqoi boksqa birjola bet burǵany belgili boldy.
Arada kóp ótpei onyń belgili promoýter Bob Arýmnyń «Top Rank» kompaniiasymen kelisimshart jasasqany habarlandy.
