Memleket basshysy Qasym-Jomart Toqaev Qazaqstan halqyna arnaǵan alǵashqy Joldaýy Túrkistan oblysy turǵyndaryn da serpiltip tastady. Óńirdegi «Taldaý jáne boljaý ortalyǵy» qoǵamdyq uiymynyń tóraǵasy Bektai Ormanov ásirese biznesin endi bastaǵan kásipkerlerdi salyqtan úsh jylǵa bosatý úlken qoldaý bolatyndyǵyn aitty, dep habarlaidy QazAqparat.
Bektai Ormanovtyń pikirinshe, Prezidenttiń eldegi memlekettik kompaniialardyń sanyn qysqartý jónindegi tapsyrmasy óte oryndy.
«Memlekettik kompaniialar sanynyń kóp bolýy naryqtaǵy básekelestikti tejeidi. Memlekettiń ekonomikaǵa aralasýyn toqtatý jolynda Prezident birqatar ózgerister engizgenin atap ótti. Iaǵni bul biznespen ainalysýshy kez kelgen kompaniiaǵa nemese kásipkerge naryqtyq básekelestikte jol ashady. Burynǵydai memlekettiń aqshasyna alaqan jaiyp otyratyn kompaniialar azaiyp, taza básekelestik paida bolady. Bul óz kezeginde ekonomikanyń keń qanat jaiýyna yqpal etedi»,- deidi qoǵamdyq uiym tóraǵasy.
Taldaý jáne boljaý ortalyǵynyń jetekshisi sondai-aq, kásipkerlerdi ýaqytsha salyqtan bosatý týraly usynysty der kezinde qolǵa alynǵanyn aitady.
«Prezidentimiz shaǵyn biznespen ainalysýshylardy 3 jylǵa deiin salyqtan bosatýdy tapsyrdy. Bul da óz kezeginde elge úlken kómek bolatyn sheshim. Bul sheshim endi aiaqqa turyp kele jatqan biznesmender úshin ońtaily bolmaq. 3 jylǵa deiin salyqtan bosatylǵan olar kásibin jolǵa qoiyp, el ekonomikasynyń damýyna yqpal etedi»,- deidi Bektai Ormanov.
.jpeg)