Pavlodar qalasyndaǵy Dostyq úiinde qazaq tili bilgirleriniń «Parasatty kásipker» baiqaýy ótkizildi. Oblystyq tilderdi damytý jónindegi basqarmasy «Rýhani jańǵyrý» baǵdarlamasy sheńberinde jáne memlekettik til saiasatyn iske asyrý maqsatynda kásipkerler arasynda memlekettik tilge arnalǵan konkýrs uiymdastyrdy.
Baiqaýǵa Pavlodar, Aqsý jáne Ekibastuz qalalarynyń túrli deńgeidegi turǵyndarǵa qyzmet kórsetý salasyndaǵy kásipkerlerden quralǵan 5 komanda qatysty. Saiys úsh kezeńde ótti. Birinshi kezeńde komandalar ózderin tanystyryp, úi tapsyrmasyn oryndasa, ekinshi kezeńde túrli qyzmet kórsetý salalarynda kezdesetin sitýatsiialyq tapsyrmalardy oryndady. Qorytyndy kezeńde termin sózderdi aýdaryp, oqiǵa jelisi boiynsha mátin qurastyrdy.
Barlyq qatysýshylar memlekettik tildegi bilimderin ortaǵa salyp, jańa termin sózderdi saýatty paidalanyp, sitýatsiialyq tapsyrmalardy sheberlikpen sheshti. Barlyq komandalar ózderiniń erekshelikterimen jáne belsendilikterimen tanyldy. Ádilqazylar alqasynyń sheshimimen I orynǵa «Ulttyq mura» komandasy (Pavlodar qalasy), ekinshi orynǵa «Belsendi kómir» komandasy (Ekibastuz qalasy) jáne úshinshi orynǵa «Samǵa» komandasy (Aqsý qalasy) laiyqty dep tanyldy. Saiysqa qatysýshylardy quttyqtaǵan oblystyq tilderdi damytý jónindegi basqarmasynyń basshysy S.Osmanova: «Mundai is-sharalar keleshekte dástúrge ainalatynyn, bul konkýrs alǵash ret ótkizilip jatqanyn alǵa tartyp, barlyq qatysýshylar memlekettik tildegi bilimderin ǵana emes, sonymen qatar oblys turǵyndaryna qyzmet kórsetýge qajetti ózderiniń jan-jaqty, shapshań qasietterin de kórsete bildi» dep atap ótti.
Iá, oblys kóleminde memlekettik tilge erekshe nazar aýdarylyp keledi. Sonyń bir dálelindei, jýyrda «Rýhani jańǵyrý» aiasynda Pavlodar oblysynyń tilderdi damytý jónindegi basqarmasynyń uiymdastyrýymen Ýspen aýdanynyń is júrgizýshilerine, aýdarmashylaryna jáne qazaq tili mamandaryna arnalǵan «Aýdarma mádenieti, resmi qujat saýattylyǵy men memlekettik tildi sapaly oqytý joldary» taqyrybynda kezekti oblystyq kóshpeli seminardy aitýymyzǵa bolady. Jalpy aǵymdaǵy jyldyń basynan bastap ótkizilgen seminarǵa Aqtoǵai, Lebiaji, Sharbaqty jáne Ýspen aýdandarynan 200-ge jýyq is júrgizýshiler, aýdarmashylar men qazaq tili mamandary qatysty. Atalǵan sharanyń plenarlyq bóliminde memlekettik til saiasatyn júzege asyrýǵa bailanysty máseleler kóterilip, qazaq tilin oqytý jónindegi standart pen tiptik baǵdarlamany iske asyrýdaǵy oqytýshylar jumysynyń negizgi baǵyttary qarastyryldy. Mundaǵy basty maqsat – qala, aýdandardaǵy qazaq tili oqytýshylarynyń biliktiligin arttyrý. Osyndai baǵyttaǵy jumystar aldaǵy ýaqytta da óz jalǵasyn taba bermek.
Aitýǵan Dáýlet
