Kásipkerler qiraǵan ǵimarattardy qalpyna keltirýge kómektesip, jańa Qazaqstannyń damýyna óz úlesterin qosýy kerek. Bul týraly Ulttyq qoǵamdyq senim keńesiniń múshesi, «Altyn Kyran» halyqaralyq qaiyrymdylyq qorynyń prezidenti Islambek Saljanov aitty, dep habarlaidy QazAqparat.
«Shyn máninde bizdiń elimiz qaiǵyly oqiǵany bastan ótkerdi. Prezidenttiń batyl sheshiminiń arqasynda óz Táýelsizdigimizdi saqtai aldyq. Árine, bolashaqta mundai jaǵdaidyń qaitalanýyna jol bermeýimiz kerek. Prezident QR Parlamenti Májilisiniń otyrysynda erekshe úndeý jasady. Biz bárimiz, sonyń ishinde kásipkerler de jańa Qazaqstandy qurý úshin Memleket basshysynyń reformalaryn qoldaýǵa tiispiz. Qazir bári artta qaldy. Prezident óz sózinde 30 jylda kóptegen áleýmettik-ekonomikalyq problemalar qordalanǵanyn, olardyń da qazirgi jaǵdaiǵa túrtki bolǵanyn aitty. Memleket basshysynyń áleýmettik baǵdarlanǵan jańa Qazaqstandy qurýymyz kerek degen jańa úndeýi aityldy, bul turǵyda halyqtyń arman-úmiti men qajettilikteri, áleýmettik ádilet birinshi orynda bolýy tiis», - dep atap ótti I. Saljanov.
Sol sebepti spiker eń aldymen, Qazaqstan Táýelsizdiginiń arqasynda 30 jylda qalyptasqan kásipkerler Prezidenttiń ainalasyna birigip, birinshi kezekte qiraǵan ǵimarattar men nysandardy qalpyna keltirýge, jańa Qazaqstannyń damýyna óz úlesin qosýǵa tiis dep esepteidi.
«Birinshi kezekte, bul Prezident aitqan iri kompaniialarǵa tikelei qatysty, olar shyn máninde baqýatty jáne Qazaqstannyń qarapaiym halqyna bet burýǵa múmkindigi bar. Oǵan bizdiń halqymyz ábden laiyq. Biz barlyq jinaqtalǵan máselelerdi sheshýimiz kerek. Jeke ózim Qazaqstannyń damýynda jańa dáýir bastalyp jatqanyna senemin», - dedi Islambek Saljanov.
Aita keteiik, Ortalyq kommýnikatsiialar qyzmetinde Ulttyq qoǵamdyq senim keńesiniń músheleri Memleket basshysynyń Qazaqstan halqyna úndeýinde aitylǵan bastamalaryn talqylady.
