Zańdy kásipkerlik qyzmetke kedergi keltirgeni úshin jaýapkershilikke tartýdyń qylmystyq baby is júzinde jumys istemei tur. Bul týraly Qazaqstan Respýblikasy kásipkerleriniń quqyqtaryn qorǵaý jónindegi ýákili Rýstam Júrsinov málim etti, dep habarlaidy QazAqparat.
«Bizneske aýqymdy shyǵyn keltirgeni úshin memlekettik qyzmetshiler ózderiniń qatelikterine is júzinde eshqandai jaýapkershilikti almaidy. Statistikaǵa qaraǵanda, qylmystyq ári ákimshilik yqpal etý sharalary óte sirek qoldanylady», - dedi R. Júrsinov Qazaqstanda shaǵyn jáne orta kásipkerlikti damytý salasyndaǵy memlekettik saiasatty jáne quqyqtyq retteýdi jetildirý taqyrybyndaǵy Parlamenttik tyńdaýda.
Onyń aitýynsha, zańdy kásipkerlik qyzmetke kedergi jasaǵany úshin qylmystyq jaýapkershilik (365-bap) eskerilgen.
«Tájiribe júzinde ol jumys istemei tur. Sońǵy 3 jylda 1 adam sottalǵan», - dep naqtylady ýákil.
Taratylǵan málimetterge qaraǵanda, 2016 jyly 365-bap boiynsha jeti quqyq buzýshylyq boiynsha qylmystyq is qaraýda bolǵan, beseýi sotqa joldanyp, 3 adam sottaldy. 2017 jyly bes quqyq buzýshylyq boiynsha is qaralyp, bir adam sotty boldy. 2018 jyly osyndai statistika tirkelmese, 2019 jyly úsh quqyq buzýshylyqqa qatysty is qaralyp, sotqa bireýi joldandy.
