Joǵarǵy sot 2012 jyldan beri jazasyn ótep jatqan balqashtyq kásipker Qýat Sultanbekovke qatysty isti toqtatty, - dep habarlaidy Massaget.kz.
Vedomstvonyń baspasóz qyzmetiniń málimetinshe, Shyǵys Qazaqstan oblystyq soty prokýrordyń Qýat Sultanbekovke qatysty sot aktilerin jańadan ashylǵan mán-jailarǵa bailanysty kúshin joiý týraly ótinishterin qarady.
"Prokýror Sultanbekovpen júrgizilgen tergeý nátijesinde alynǵan dáleldemelerdi keltirdi. Jaýap alý jáne jasyryn tergeý áreketteriniń nátijesinde jábirlenýshiler men kýágerlerdiń tergeý barysynda jáne sotta Sultanbekovke jala jaýyp kelgeni anyqtaldy. Sultanbekovti kináli dep tanyǵan aiǵaq jalǵan ekeni dáleldendi", - delingen habarlamada.
Sultanbekovtiń úsh qylmystyq is boiynsha tolyqtai aqtalǵany belgili boldy.
Sondai-aq, Sultanbekovtiń advokaty Iýliia Djafarova Tengrinews.kz tilshisine onyń qorǵaýyndaǵy azamattyń Nur-Sultandaǵy tergeý izoliatorynan bosatylǵanyn aitty.
Eske salaiyq, Sultanbekovke 2012 jyly mamyrda atys qarýyn zańsyz satyp aldy, saqtady, tasymaldady dep aiyp taǵylyp, úsh jyl alty aiǵa bas bostandyǵynan aiyrylǵan bolatyn. Alaida, ol túrmege toǵytylyp, sheshim shyqqan soń, basqa da qylmystyq isteri qarastyrylyp, nátijesinde birneshe úkimnen keiin bas bostandyǵynan aiyrý merzimi 3,5 jyldan 21 jylǵa deiin ósti. Sultanbekovtiń týystary bul oǵan jabylǵan jala men qastandyq bolýy ábden múmkin ekenin málimdedi.
