Parlament Senatynyń jalpy otyrysynda «Qazaqstan Respýblikasynyń Eńbek kodeksine qashyqtan jumys isteýdiń quqyqtyq rettelýin jetildirý máseleleri boiynsha ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaidy "Ult aqparat".
Bul qujat Parlament depýtattarynyń bastamashylyǵymen ázirlendi.
«Búgingi tańda álemdik praktikada qashyqtan jumys isteý belsendi damý ústinde, sondai-aq jumyskerdiń aralas jumys isteý rejiminde jumys isteýdi úilestirýiniń quqyqtyq múmkindigi keńinen taralǵan. Koronavirýstyń taralýyna deiin júrgizilgen halyqaralyq zertteýlerge súiensek, 2020 jyldyń basynda álemdik kompaniialardyń 16%-y tolyǵymen qashyqtan jumys istedi, al 40%-y aralas jumys rejimin qoldandy. Ózderińizge belgili, 2020 jyly Qazaqstan aýmaǵynda COVID-19 koronavirýs infektsiiasynyń taralýy, qyzmetkerlerdiń orta eseppen 70%-yn qashyqtan jumys isteýge aýystyryp, jumys rejiminiń ózgerýine alyp keldi», - dedi Senat depýtaty Nariman Tóreǵaliev zań jobasyn birinshi oqylymda qaraý kezinde.
Onyń aitýynsha, elimizde qashyqtan jumys isteýdi uiymdastyrýdyń qalyptasqan tájiribesi, pandemiia kezeńindegi eńbek salasyndaǵy naqty protsester men eńbek zańnamasy arasyndaǵy alshaqtyqty kórsetti. Atalǵan máseleler qoldanystaǵy Eńbek kodeksiniń 138-babymen ǵana retteldi, ol óz kezeginde búgingi qashyqtan jumys isteý problemalaryn tolyqqandy sheshýge múmkindik bermedi. Anyqtalǵan olqylyqtardy eskere otyryp depýtattar birqatar usynys jasady.
«Atap aitqanda qashyqtan jumys isteýge aýysqan qyzmetkerlerdiń tap bolǵan ótkir máseleleriniń biri – kommýnikatsiia quraldarymen, kompiýterlermen jáne basqa da quraldarmen qamtamasyz etý bolatyn. Osyǵan bailanysty zań jobasynda kózdelgen normaǵa sáikes, tótenshe jaǵdaidy engizý, jariialaý jáne shekteý issharalaryn, onyń ishinde karantindi engizý kezeńinde ýaqytsha qashyqtan jumys isteý kezinde jumyskerlerdi kommýnikatsiia quraldarymen qamtamasyz etý jáne shyǵystardy óteý qajettiligi jumys berýshiniń aktisinde aiqyndalady. Eger jumysker óziniń kommýnikatsiia quraldaryn turaqty negizde paidalanatyn bolsa, jumys berýshi ótemaqy tólei alady, onyń mólsheri, tóleý tártibi men merzimderi taraptardyń kelisýi boiynsha belgilenedi», - dep túsindirdi senator.
Kelesi taǵy bir norma, taraptardyń kelisýi boiynsha qashyqtan jáne qashyqtan aralas jumys isteý uǵymdaryn engizý týraly. Aralas jumys isteý jumys kezeńderin jumys berýshi ornalasqan jerde de, odan tys jerde de kezektestirýge múmkindik beredi.
«Jumyskerlerdiń eńbek quqyqtaryn qorǵaý maqsatynda eńbek shartynda jumys ýaqytynyń tirkelgen esebin belgileý jónindegi norma kózdeldi, osy ýaqyt ishinde jumysker jumys ýaqytynyń kúndelikti uzaqtyǵynyń shekteýlerin saqtai otyryp, jumys ýaqyty sheginde jumys berýshimen bailanysta bolý úshin qoljetimdilik rejiminde bolýǵa tiis.
Bul rette, eńbek sharty taraptarynyń kelisýi boiynsha qashyqtan jumys isteitin jumyskerler úshin jumys ýaqytynyń jiyntyq esebin qoldana otyryp, ikemdi jumys ýaqyty rejimi belgilenýi múmkin.
Sonymen birge, oryndalatyn jumys kólemi saqtalǵan jaǵdaida jumys berýshige, qashyqtan jumys isteitin qyzmetkerdiń jalaqysyn tómendetýge múmkindik bermeitin norma engizildi. Jumys berýshiniń, jumyskerler qashyqtyqtan jumys isteý kezinde paidalanatyn qupiia aqparatty qorǵaý týraly shart jasasý quqyǵy bekitildi», - dedi Nariman Tóreǵaliev.
Onyń paiymynsha, zań jobasynyń qabyldanýymen qashyqtan jumys isteýdi naqty reglamentteý jáne eńbek sharty taraptarynyń quqyqtary men mindetterin bekitý arqyly jumyskerlerdiń eńbek quqyqtaryn qorǵaý qamtamasyz etiletin bolady.
