Qashyqtan oqytý formaty muǵalimder men oqytýshylardyń eńbekaqysyna áser etpeýi tiis. QR Bilim jáne ǵylym ministri Ashat Aimaǵambetov jaǵdaidy osylai túsindirdi, dep habarlaidy "Ult aqparat".
«Qashyqtan oqytý formaty jalaqyǵa esh áser etpeýi kerek, jalaqy da azaimaýy kerek. Óitkeni áriptesterimiz sol baiaǵy jumys kólemin atqarady. Daiyndyq jumystary ádettegiden de kóp bolatyn kezderi bolady. Sondyqtan, muǵalimderdiń jalaqysyn ózgertpeý týraly tapsyrma berdik. Bul tapsyrma arnaiy buiryqta naqty bekitilgen», - dep jaýap berdi ministr Ortalyq kommýnikatsiialar qyzmetinde tilshi saýalyna.
Eske sala ketsek, elimizdegi tótenshe jaǵdaiǵa bailanysty mektep oqýshylary, JOO jáne kolledj stýdentteri qashyqtan oqytý formatyna kóshirildi.
Buǵan deiin ministr qazaqstandyq mektep oqýshylarynyń teledidar, radio, internet jáne poshta arqyly bilim alatynyn málimdegen edi.
1 sáýirde Qazaqstannyń barlyq mektepteri qashyqtan oqytý boiynsha synama sabaq ótkizedi.
Barlyq suraqtar boiynsha Bilim jáne ǵylym ministrliginiń 1450 koll-ortalyǵyna habarlasýǵa bolady.
