Ýaqytsha qashyqtan oqytý kezinde mektep oqýshylary qajetti tehnikamen qamtamasyz etiledi. Bul týraly QR Bilim jáne ǵylym ministri Ashat Aimaǵambetov málim etti, dep habarlaidy "Ult aqparat".
«Biz qashyqtan oqytý júiesin ustanǵan kezde basqa damyǵan elderde de oryn alyp jatqan keibir qiyndyqtar týyndaýy múmkin ekenin jaqsy túsinemiz. Bir otbasynda birneshe oqýshy oqyǵan jaǵdaida bir kompiýter men bir smartfondy paidalanýdyń yńǵaisyzdyǵy týyndaýy nemese qajetti tehnikanyń múldem bolmaýy da múmkin. Keibireýlerde internet bailanysy da joq. Prezident qashyqtan oqytýdy uiymdastyrý úshin barlyq qajetti sharalardy qabyldaýǵa tapsyrma berdi. Bul máseleler qazir erekshe baqylaýda. Ákimdiktermen birlese otyryp, mekteptegi kompiýterlerdi oqýshylar men muǵalimderge ýaqytsha paidalanýǵa berý, tipti, qajet bolǵan jaǵdaida, mektepterge qosymsha tehnika (planshetter nemese kompiýterler) satyp alyp, olardy da ýaqytsha paidalanýǵa berý máselelerin qarastyrýdamyz. Keibir óńirler bul jumysty bastap ketti», - dep jazdy ministr áleýmettik jelidegi paraqshasynda.
Sonymen qatar ol shalǵaidaǵy aýyldarda oqýshylardy oqytýǵa qatysty túsinik berdi.
«Epidemiologiialyq ahýalǵa qarai, shalǵaidaǵy aýyldyq eldi mekenderde ornalasqan shaǵyn jinaqty mektepterde (80-ge jýyq bala oqityn) oqytýdy dástúrli formatta jalǵastyrý múmkindigin qarastyrýdamyz, taǵy bir márte atap aitamyn – tek qarastyrýdamyz. Bul másele boiynsha túpkilikti sheshim áli qabyldanǵan joq, bul másele kanikýl aiaqtalǵansha sheshiledi. Al ázirshe olar da qashyqtan oqytýǵa belsendi daiyndalýda», - dedi A. Aimaǵambetov.
Osy oraida vedomstvo basshysy jańa rejimde jumys isteý pedagogter úshin de, balalar úshin de ońai sharýa emes ekenin, biraz kúsh-qýatty talap etetinin jetkizdi.
«Bul – otandyq bilim berý júiesi úshin úlken syn ekeni ras. Biz bastapqy kezeńde oqýshylardyń ata-analary tarapynan da, pedagogter tarapynan da kóp syn aitylatynyna daiynbyz jáne árqashan ashyq dialogqa shaqyramyz. Ata-analar, pedagogter men oqýshylar arasyndaǵy pikirtalasty muqiiat qadaǵalap otyramyz jáne qashyqtan oqytýdyń qol jetimdiligin arttyratyn tiimdi sharalardy qabyldaýǵa daiynbyz. Qandai da bir problema týyndasa, Siz árqashan Bilim jáne ǵylym ministrligine habarlasa alasyz. Biz problemańyzdy sheshýge kómektesýge tyrysamyz. Bul rette ulaǵatty ustazdarymyzǵa alǵysymdy bildirgim keledi! Qiyn kezeńge qaramastan, kóptegen muǵalimder jaǵdaiǵa beiimdelip, óz mindetin laiyqty atqarýdy jalǵastyrýda. Elimiz mundai kásibi deńgeidegi mamandarymen maqtana alady. Men birlesken kúsh-jigerimizdiń arqasynda osy kezeńdi abyroimen eńsere alatynymyzǵa shyn júrekten senemin», - dedi Ashat Aimaǵambetov.
