Semei qalasynda qashyqtan oqý úshin qyzyna mektepten berilgen noýtbýkty satyp jibergen áiel túrmege qamaldy, dep habarlaidy "Ult aqparat".
Qalalyq №2 soty baspasóz qyzmetiniń málimetine súiensek, qashyqtan oqytý kezinde az qamtylǵan otbasydan shyqqan 4-synyp oqýshysyna mektep ákimshiligi ýaqytsha qoldanýǵa noýtbýk bergen. Alaida birneshe aidan keiin qyzdyń noýtbýkty múlde qoldanbaityndyǵy anyqtaldy.
Oqýshy onlain sabaqtarǵa jii qatyspai, úi tapsyrmalaryn oryndamai kelgen. Osyǵan bailanysty muǵalimder balanyń anasymen sóilespek bolady.
«Qyzyna berilgen quny 160 myń teńgelik noýtbýkty áiel adam 40 myń teńgege satyp jibergen. Aiyptalýshy osyndai qadamǵa aqshadan qatty qysylǵandyqtan barǵandyǵyn aitty. Dese de áieldiń bul somany alkogoldi ishimdik alýǵa jumsaǵany belgili boldy», - delingen aqparatta.
Semei turǵyny buǵan deiin de sotty bolǵan eken. Ótken jyldyń tamyz aiynda qaraqshylyq jasaǵany úshin 7 jylǵa bas bostandyǵynan aiyrylǵan. Alaida qaramaǵynda kámelettik jasqa tolmaǵan balasynyń bolýyna bailanysty sot sheshiminiń oryndalýy 3 jarym jylǵa shegerildi.
«Qaitara qylmys jasaǵany úshin sottalýshy 7 jyl 6 ai merzimge temir torǵa qamaldy. Sonymen qatar áielden bilim berý mekemesiniń paidasyna 160 myń teńge óndirý týraly azamattyq talapty qanaǵattandyrdy», - delingen málimette.
