سەمەي قالاسىندا قاشىقتان وقۋ ٷشٸن قىزىنا مەكتەپتەن بەرٸلگەن نوۋتبۋكتى ساتىپ جٸبەرگەن ەيەل تٷرمەگە قامالدى, دەپ حابارلايدى "ۇلت اقپارات".
قالالىق №2 سوتى باسپاسٶز قىزمەتٸنٸڭ مەلٸمەتٸنە سٷيەنسەك, قاشىقتان وقىتۋ كەزٸندە از قامتىلعان وتباسىدان شىققان 4-سىنىپ وقۋشىسىنا مەكتەپ ەكٸمشٸلٸگٸ ۋاقىتشا قولدانۋعا نوۋتبۋك بەرگەن. الايدا بٸرنەشە ايدان كەيٸن قىزدىڭ نوۋتبۋكتى مٷلدە قولدانبايتىندىعى انىقتالدى.
وقۋشى ونلاين ساباقتارعا جيٸ قاتىسپاي, ٷي تاپسىرمالارىن ورىنداماي كەلگەن. وسىعان بايلانىستى مۇعالٸمدەر بالانىڭ اناسىمەن سٶيلەسپەك بولادى.
«قىزىنا بەرٸلگەن قۇنى 160 مىڭ تەڭگەلٸك نوۋتبۋكتى ەيەل ادام 40 مىڭ تەڭگەگە ساتىپ جٸبەرگەن. ايىپتالۋشى وسىنداي قادامعا اقشادان قاتتى قىسىلعاندىقتان بارعاندىعىن ايتتى. دەسە دە ەيەلدٸڭ بۇل سومانى الكوگولدٸ ٸشٸمدٸك الۋعا جۇمساعانى بەلگٸلٸ بولدى», - دەلٸنگەن اقپاراتتا.
سەمەي تۇرعىنى بۇعان دەيٸن دە سوتتى بولعان ەكەن. ٶتكەن جىلدىڭ تامىز ايىندا قاراقشىلىق جاساعانى ٷشٸن 7 جىلعا باس بوستاندىعىنان ايىرىلعان. الايدا قاراماعىندا كەمەلەتتٸك جاسقا تولماعان بالاسىنىڭ بولۋىنا بايلانىستى سوت شەشٸمٸنٸڭ ورىندالۋى 3 جارىم جىلعا شەگەرٸلدٸ.
«قايتارا قىلمىس جاساعانى ٷشٸن سوتتالۋشى 7 جىل 6 اي مەرزٸمگە تەمٸر تورعا قامالدى. سونىمەن قاتار ەيەلدەن بٸلٸم بەرۋ مەكەمەسٸنٸڭ پايداسىنا 160 مىڭ تەڭگە ٶندٸرۋ تۋرالى ازاماتتىق تالاپتى قاناعاتتاندىردى», - دەلٸنگەن مەلٸمەتتە.
