Qashaǵanda gaz óńdeý zaýytyn salyp jatqan GPC Investment kompaniiasy respýblikalyq menshikke ótedi. Úkimet tiisti qaýlyny qabyldady, - dep habarlaidy "Ult aqparat" primeminister.kz saityna silteme jasap.
"GPC Investment" JShS jarǵylyq kapitalyna qatysý úlesteriniń 100 paiyzyn syiǵa tartý sharty boiynsha respýblikalyq menshikke berý týraly "Tau Bereke Group" JShS-nyń usynysy qabyldansyn", - delingen qaýly mátininde.
Aita keteiik, "GPC Investment" kompaniiasy – "Qashaǵan ken orny shikizatynyń bazasynda qýaty tekshesine 1,15 milliard metr gaz óńdeý zaýytyn salý" jobasynyń operatory.
"Jeke investordyń jobany iske asyrýdy jalǵastyrýdan bas tartýyna bailanysty GPC Investment kompaniiasy "QazaqGaz" UK" AQ balansyna beriledi.
Óz kezeginde, bul ishki naryqty baǵasy qoljetimdi taýarlyq jáne suiytylǵan gazben qamtamasyz etýdi arttyrýǵa, sondai-aq zaýyt qurylysynyń jobasyn ýaqytyly júzege asyrýǵa múmkindik beredi", - deidi Úkimettiń baspasóz qyzmeti.
