Qarjysyn Bishimbaev qaltasyna basqan zaýytqa qosymsha aqsha bólinbeidi. Bul týraly búgin Úkimettiń selektorlyq rejimdegi otyrysynan keiin BAQ ókilderiniń saýalyna jaýap bergen «Báiterek» UBH» AQ basqarmasynyń tóraǵasy Erbolat Dosaev málim etti, dep habarlaidy QazAqparat.
Aita keterligi, Qyzylorda qalasynda tabaq shyny shyǵaratyn zaýyt qurylysy osy jyldyń qazan aiynda aiaqtalýy tiis bolatyn.
«Bul aldyn ala jospar edi jáne biz Qyzylorda oblysy ákimdigimen ony barynsha oryndaýǵa tyrysamyz. Biraq, másele «Shymkenthimmontaj» jumysy qorytyndysyn qaraýǵa jáne biz qabyldaityn sharalarǵa bailanysty. Jumaǵa deiin bizdiń tarabymyzdan barlyq qajetti sheshimder qabyldanatyn bolady. Iaǵni, «Shymkenthimmontajǵa» ózderiniń mindettemelerin oryndamaǵandyǵy jaiynda narazylyq beriledi», - dedi Dosaev.
Osy rette Dosaev BAQ ókilderiniń zaýyt qurylysyna qosymsha qarjy bóline me degen saýalyna da jaýap berdi.
«Joq, qosymsha sharalarǵa sáikes bas merdiger tarabynan bizde sáikesinshe kepil bar jáne osy protsedýralyq sharalar qoldanylady», - dedi ol.
Budan buryn habarlanǵandai, «Báiterek UBH» AQ basqarmasynyń burynǵy tóraǵasy Qýandyq Bishimbaevqa qatysty qylmysty tergeý amaldary júrip jatyr. Sybailas jemqorlyqqa qarsy kúres ulttyq biýrosy habarlaǵandai, ol bir top adammen aldyn ala kelisip, birneshe ret iri kólemde para aldy dep aiyptalýda. Bishimbaev Qyzylorda qalasynda tabaq shyny shyǵaratyn jáne óńdeitin zaýytyn salý kezinde «Orda Glass» JShS-nyń vedomstvolyq baǵynystaǵy kompaniiasy men onyń merdigerlik uiymy «Shymkenthimmontaj» JShS arqyly 1 mlrd teńge jymqyrý qylmystyq shemasyn uiymdastyrǵan degen kúdikke ilindi. Osy oraida ol atalǵan somanyń 2 mln AQSh dollaryn ózine alǵandyǵy tekserilýde.
