2020 jyldyń 1-toqsanynda júieli jolǵa túsken jemqorlyqtyń 40 faktisi anyqtalyp, joly kesildi. Bul týraly QR Sybailas jemqorlyqqa qarsy is-qimyl agenttigi Strategiia jáne jedel basqarý departamentiniń basshysy Nurlan Jaqsymbetov aitty, dep habarlaidy "Ult aqparat".
Agenttiktiń 2020 jyldyń 1-toqsanyndaǵy negizgi nátijelerine toqtalǵan onyń dereginshe, osy aralyqta 892 qylmystyq quqyq buzýshylyq tirkelgen. Olardyń basym bóligin, iaǵni 77 paiyzyn talan-tarajǵa salý men paraqorlyq quraidy.
«Tolyqtai alǵanda, ótken jyldyń dál osyndai kezeńimen salystyrǵanda sybailas jemqorlyq qylmystarynyń sany 12 paiyzǵa jýyq qysqaryp otyr. Bul oń ózgeris eń aldymen aldyn alý jumystary tiimdiliginiń artýyna jáne tótenshe jaǵdai rejimine bailanysty boldy. Biraq, bul tizgindi bos jiberdik degendi bildirmeidi. Búginde jemqorlyqtyń barynsha kúrdeli nysandaryna nazar aýdara tústik. Oǵan asa aýyr jemqorlyq qymystardy anyqtaý 2 ese, aýyr qylmystar 12 paiyzǵa ósýi dálel bola alady», - dedi ol.
Departament basshysynyń aitýynsha, júieli jemqorlyqtyń 40 faktisi anyqtaldy. Onyń aiasynda shamamen 200 qylmys tirkeldi. Ótken jyldyń birinshi toqsanymen salystyrǵanda iri kólemde talan-tarajǵa salý qylmystaryn anyqtaý 28 paiyzǵa ósti. Memlekettik baǵdarlamalardy júzege asyrý barysyndaǵy qylmystardy áshkereleý 2 esege jýyq artty. Olardyń jartysynan kóbi 2020 jylǵa deiin óńirlerdi damytý, bilim jáne ǵylym, agroónerkásip kesheni salalaryna qatysty baǵdarlamalardy júzege asyrý barysynda oryn alǵan.
«Shaǵyn jáne orta biznes qyzmetine zańsyz aralasýdyń 48 faktisi anyqtaldy. Bul baǵytta qylmystyq-quqyqtyq sharalardan bólek bizdiń PBI (protecting business and investments) jobamyz da bizneske úlken kómek kórsetip jatyr. Búginde sybailas jemqorlyqqa qarsy qyzmettiń súiemeldeýimen jalpy quny 12,7 trln teńgeden asatyn 451 biznes joba júzege asyrylyp jatyr. Bul naqty bir deńgeidegi senim kórsetkishi ekeni sózsiz», - dedi Nurlan Jaqsymbetov.
