Almaty men Shymkent modýldik aýrýhanalaryna jumsalǵan qarjy tekserilip jatyr. Bul týraly QR Sybailas jemqorlyqqa qarsy is-qimyl agenttigi jemqorlyqqa qarsy is-qimyl 1-departamentiniń basshysy Murat Ahmetov aitty, dep habarlaidy QazAqparat.
«Modýldik aýrýhanalar boiynsha agenttikte 2 is bar. Tek Almaty emes, Shymkent qalasynda da tergeý júrip jatyr. Júrgizilgen memlekettik aýdit aktileriniń nátijesinde belgili bir soma anyqtalyp, oǵan saraptama taǵaiyndaldy. Olar aiaqtalǵannan keiin sońǵy protsessýaldyq sheshim qabyldanady. Bul soma bastapqy, tek anyqtalǵany ǵana jáne sarapshylardyń qaraýynda. Memlekettik saraptama jobalyq-smetalyq qujattama boiynsha júrgizilip jatyr. Sondyqtan tergeý nátijesi boiynsha naqty somany sizderge jetkizetin bolamyz. Ár aýrýhananyń quny - 5,5 mlrd teńgeden», - dedi ol agenttiktiń alqa otyrysy aiasynda BAQ ókilderine bergen suhbatynda.
Onyń atap ótýinshe, kináliler tergeý barysynda anyqtalady. Al kúdiktiler alynǵan dálelder negizinde belgili bolady.
Aýrýhana qurylysynyń qunyn negizsiz kóterýge qatysty da saraptama júrgizilip jatyr. Saraptamalar 1-2 aiǵa sozylady.
«Shynaiylyq úshin tergelip jatqan is aiasynda atalǵan faktige qatysýshylardyń barlyǵy tekseriledi», - dedi Murat Ahmetov.
