Qazaqstanda qarjy sektoryn damytýdyń 2030 jylǵa deiingi tujyrymdamasy ázirlenedi. Bul týraly Qarjy naryǵyn retteý jáne damytý agenttiginiń tóraǵasy Madina Ábilqasymova málim etti, dep habarlaidy QazAqparat.
«Agenttik qarjy júiesiniń uzaq merzimdi turaqtylyǵyn, onyń ishinde táýekelge baǵdarlanǵan qadaǵalaý quraldaryn odan ári keńeitý arqyly qamtamasyz etedi. Bank júiesiniń turaqtylyǵyn qamtamasyz etý jáne biznesti kreditteý úshin 2020 jyly engizilgen prýdentsiialyq retteýdiń ýaqytsha sharalary qaita qaralady. Qarjy naryǵyn damytýdyń orta merzimdi perspektivadaǵy strategiialyq baǵyttaryn aiqyndaý úshin biyl Qarjy sektoryn damytýdyń 2030 jylǵa deiingi tujyrymdamasy ázirlenedi», - dedi Madina Ábilqasymova Úkimet otyrysynda Makroekonomikalyq saiasat sharalaryn úilestirý týraly kelisimdi talqylaý barysynda.
Onyń aitýynsha jumys istemeitin aktivterdiń ótimdi naryǵyn qurý maqsatynda quqyqtyq jáne salyq kedergilerin joiý úshin, sondai-aq strestik aktivter naryǵyna jeke basqarýshy kompaniialardy tartý úshin zańnamalyq túzetýler ázirlenedi.
«Qor naryǵyna jergilikti jáne sheteldik jeke investorlardy keńinen tartý úshin Halyqtyq IPO formatynyń tásilderi aiqyndalady. Shaǵyn jáne orta kapitaly bar jeke qazaqstandyq emitentter sanyn ulǵaitý mindeti tur. Ol úshin agenttik salyqtyq jáne ózge de talaptardy ázirleidi», - dedi ol.
