Búgin QR Ishki ister ministrligi Moldova Respýblikasynan A.Myrzabekovti ekstraditsiialady. Kúdikti 27 aqpan kúni Qazaqstan IIM-niń suranysymen Moldova astanasynda ustalyp, Kishinev qalasynyń tergeý izoliatoryna qamalǵan bolatyn, dep habarlaidy "Ult aqparat" Polisia.kz portalyna silteme jasap.
«Myrzabekovti ekstradatsiialaýdy elimizdiń Bas prokýratýrasynyń jáne Ishki ister ministrliginiń járdemimen qazaqstandyq politseiler júzege asyrdy. Qazirgi ýaqytta sotqa deiingi tergeý amaldaryn IIM Tergeý departamenti qolǵa alǵan. Jedel tergeý tobynyń quramyna barlyq aýmaqtyq politsiia departamentteriniń qyzmetkerleri kirip otyr. Qarjy piramidasynyń qurylǵan oshaǵy Aqtóbe óńiri jáne uiymdastyrýshylar osy oblystyń týmalary bolǵandyqtan, olardyń qatysýymen tergeý is-qimyldary Aqtóbe qalasynda ótip jatyr. Buǵan qosa, aýmaqtyq bólimshelerdiń tergeýshileri aldanǵan salymshylardy jáne urlanǵan qarajatty anyqtaý jumystaryn jalǵastyrý ústinde. Qazirgi ýaqytta ishki ister organdaryna shamamen 8 myń azamat shaǵym jasady jáne kelgen shyǵyn 10 mlrd teńgeden asyp otyr. Zardap shegýshilerden shaǵym áli de túsýde», - delingen aqparatta.
Málim etilgendei, is boiynsha 42 kúdikti anyqtalyp, onyń 19-y sot sanktsiiasymen qamaýǵa alyndy jáne 8-ine izdeý jariialandy. Qarjy piramidasynyń belsendi qatysýshylarynyń biri A.Ysqaqov tergeýden Qyrǵyzstan aýmaǵynda jasyrynǵan bolatyn. Ol Bishkek qalasynda ustalyp, 20 sáýirde Qazaqstanǵa jetkizildi. Qylmystyq istiń tergelý barysy IIM basshylyǵynyń airyqsha baqylaýynda tur.
Esterińizge sala keteiik, A.Myrzabekov - «Garant 24 Lombard» JShS-nyń quryltaishysy. Ol «ESTATE Lombard» jáne «Vygodnyi zaim» uiymdarynyń da qylmystyq áreketterine basshylyq jasaǵan. Joǵaryda atalǵan kompaniialardyń barlyǵy Qazaqstan aýmaǵynda qarjy piramidasyn qurǵan jáne olardyń alaiaqtyq áreketteri saldarynan ondaǵan myń adam zardap shegip otyr.
Buǵan deiin qyzylordalyq politseilerdiń qarjy piramidasyn qurǵandarǵa qatysty qylmystyq is qozǵaǵanyn, Shyǵys Qazaqstan oblysynda «Garant 24 Lombard» JShS salymshylary 52,5 mln teńgesinen aiyrylǵanyn jáne «Garant 24 Lombard» uiymynyń Taraz bólimshesiniń direktory ustalǵanyn habarlaǵan bolatynbyz.
