Sondai-aq, ol nege Mudarabah Capital quryltaishysy emes ekenin túsindirdi. Vainer bul kompaniia 2020 jyldyń mamyrynda qurylǵanyn aitty.
"Oǵan esh qatysym joq: 2020 jyldyń qyrkúieginde aqsha salyp, tólemdi kúttim. 2020 jyldyń qarashasynda Mudarabah Capital direktory salym senimdi ekenine kúmándanbaýym úshin JShS qatysýshylaryna qosylýdy usyndy. Men odan da kóp aqsha salýdy josparlap júrgendikten, kelistim. Men kompaniiaǵa tek 2020 jyldyń qarashasynda, ol naryqta belsendi jumys istep turǵan kezde ǵana qosyldym.
Maǵan qarjy piramidasy shemasyn uiymdastyrdy, qurdy nemese basqardy deý ádiletsizdik. Bul múldem bos sóz: barlyq aqparat bar, bárin eGov saitynda tekserýge bolady. Meniń oiymsha, politsiia qoǵamdyq pikirdi qoldan jasap otyr. Óitkeni politsiia men bilikke halyqty qoldap belsendi málimdeme jasaǵanym unamaidy jáne olar meni qylmystyq iske aralastyrǵysy keledi. Osy meni qynjyltady. Men munyń artynda kim turǵanyn da boljap, bilip otyrmyn. Aramyzda burynnan janjal bar, ol týraly estigen de shyǵarsyz", - dep qosty ol.
Tórebaevtyń aitýynsha, zańǵa sáikes JShS qatysýshylary men quryltaishylary direktordyń (atqarýshy organnyń) áreketi úshin jaýap bermeidi.
"Bul naǵyz qisynsyz dúnie - direktordyń zańsyz áreketine kompaniiada otyrǵandardy kinálaý. Bul bárine túsinikti. Qazir buǵan jol bersek, bul qaýipti mysal bolady. Kompaniiadaǵy barlyq sheshimdi, sonyń ishinde aqshany jumsaý týraly sheshim qabyldaǵan direktordyń ornyna qatysýshyny sottaidy. Eger men bul qarjy piramidasy ekenin bilsem, osynsha úlken somada aqsha salar ma edim? Bul anyq emes pe?
Jarnama úshin qylmystyq jaýapkershilikke tartý, meniń oiymsha, popýlistik kórinis. Onda osy qisynǵa sai, zorlyq-zombylyq kórinisterine túsetin búkil ártisterdi túrmege jabý kerek pe? Qoldanystaǵy zańnamada qarjylyq piramidany jarnamalaý úshin ákimshilik jaýapkershilik bar. Ol qarjy (investitsiialyq) piramidasynyń jarnamalyq qyzmetin óndirý, taratý jáne ornalastyrý jaýapkershiligin qarastyrady. Sol jetkilikti", - dep túiindedi bloger.
Buǵan deiin tanymal vainerler qarjy piramidasyn qurdy degen kúdikke ilingeni habarlanǵan bolatyn.
Áńgime tanymal blogerler Meiirjan Tórebaev, Azimjan Saidbaev jáne Meiirhan Sherniiazov týraly. Olar Qylmystyq kodekstiń 217-baby 3-bóligi 2-tarmaǵy "Qarjylyq (investitsiialyq) piramidany qurý jáne oǵan basshylyq etý" boiynsha qylmys jasady degen kúdikke ilingen. Olar bes jyldan 10 jylǵa deiin bas bostandyǵynan aiyrylýy múmkin.
Eske salaiyq, almatylyqtar tanymal telejúrgizýshi men vainerler jarnamalap jatqan qarjy piramidasyna shaǵymdanǵan bolatyn.
Almaty turǵyny Sáken Nurahmetov Instagram áleýmettik jelisinde túrli blogerler paraqshasyna tirkelgenin aitty. Olardyń biriniń paraqshasynan ol Mudarabah Capital kompaniiasyna "tiimdi islam investitsiialary" týraly beinerolik kórgen. Jarnama videosyna vainer Meiirjan Tórebaev, Meiirhan Sherniiazov jáne Azimjan Saidbaev túsken.
