© Vladimir Gerdo/ TASS, arhiv
Alaiaq jolmen ańqaý halyqtyń 136 million teńgesin qaltasyna basqan. Elordada taǵy bir qarjy piramidasy áshkerelendi. Tolyq resmi ataýy Sincere Systems Group LTD uiymyna qatysty qazir tergeý júrip jatyr, dep jatyr Ult.kz KTK arnasyna silteme jasap.
Ataýynyń ózinen sheteldik kompaniianyń iisi shyǵyp turǵandai-aq. Uiym ózin kópshilikke Ulybritaniiada tirkelgen investitsiialyq qor retinde tanystyrǵan. Forex naryǵynda maining, senimgerlik basqarý syndy qazirgi zamanda suranysqa ie qyzmet túrin usynyp otyrǵan. Kún sanap tabysyn arttyryp otyrǵany jóninde jalǵan qujat kórsetip, tirlikteriniń shala emes ekenin dáleldeýmen bolǵan basshylary, salymshylarǵa ai saiynǵy tabysyn 20 paiyzǵa deiin, al jyldyq tabysyn 180 paiyzǵa deiin arttyrýdy ýáde etken.
Al sózderiniń nanymdy bolýy úshin jalǵan qor basshylary ár azamatqa jeke kabinetiniń logini men qupiia sózin berip qoiady. Onda virtýal depozitte jalǵan tabystyń «ósimin» salymshylar baqylap otyrǵan. Osylaisha ai saiyn ósken sanǵa qýanyp máz bolyp júripti.
Ernar Taijan, QR Qarjy monitoringi agenttiginiń resmi ókili:
– Keltirilgen zalaldyń jalpy somasy 136 mln teńgeden asty. Qylmystyq jolmen alynǵan tabysqa uiymdastyrýshylar elordada eki páter jáne eki avtokólik satyp alǵan, ony tárkileýden jasyrý maqsatynda senimdi tulǵalardyń atyna rásimdegen. Sot sanktsiiasymen atalǵan múlikke tyiym salyndy. Kúdiktilerge qatysty bultartpaý sharasy retinde elden shyqpaý jáne tiisti minez-qulyq týraly qolhat qoldanyldy.
