QR IIM Tergeý departamentiniń basshysy Sanjar Ádilov qarjy piramidalary tarapynan keltirilgen shyǵyndy Qazaqstan azamattaryna ótep berýge qatysty túsinik berdi, dep habarlaidy QazAqparat.
«Alaiaqtar áreketinen zardap shekken azamattardy bir ǵana másele alańdatady, iaǵni olar keltirilgen shyǵyn qalai óteletinin suraidy. Bizdiń qyzmet salymshylardyń urlanǵan aqshalary men aktivterin anyqtaýǵa, alaiaqtar qylmystyq jolmen jiǵan múlikti anyqtaýǵa, sondai-aq oǵan der kezinde toqtam salýǵa baǵyttalǵan», - dedi S. Ádilov ministrlik uiymdastyrǵan onlain brifingide.
Osy oraida ol qylmystyq ister sotqa joldanǵannan keiin, keltirilgen shyǵyndy óteýge qatysty másele sotta qaralatynyn eske saldy.
«Árine, kúdiktilerdiń qylmystyq jolmen jiǵan barlyq múlki sot sheshimimen zardap shekkenderdiń shyǵynyn óteýge baǵyttalady. Osy qadamdarǵa qoldanystaǵy zańnamamen kepildik berilgen», - dedi Sanjar Ádilov.
Budan buryn habarlanǵandai, departament basshysy «Garant 24 Lombard» isiniń mán-jaiyn aityp berdi.
«Garant 24 Lombard» qarjy piramidasyn uiymdastyrýshylarǵa qatysty qylmystyq is aiaqtaldy. Osy is boiynsha 18 myńnan astam adam shaǵymdandy, keltirilgen shyǵynnyń jalpy somasy 22 mlrd teńgeden astam. Qylmystyq isti tergeý úshin Ishki ister ministrliginiń arnaiy jedel toby quryldy, oǵan 150-den astam qyzmetker endi», - dedi S. Ádilov.
