QR Qarjy ministrligi 2020 jyldyń sońyna deiin onlain baqylaý-kassalyq mashinasyna balama retinde dara kásipkerlerge (ózin-ózi jumyspen qamtýshylarǵa, salyq tóleýshilerge, patent boiynsha jumys isteitinderge) arnalǵan tegin mobildik qosymsha ázirleýge yqpal etetinin málimdedi, dep habarlaidy "Ult aqparat" Memlekettik kirister komitetine silteme jasap.
«Shaǵyn jáne orta biznes ókilderi úshin Memlekettik kirister komitetiniń aqparattyq júielerin ekinshi deńgeili banktermen integratsiialaý jumystary júrgizilýde. Aldaǵy ýaqytta jeke tulǵalar men kásipkerlerdiń aqshalai aýdarymdary úshin paidalanylatyn mobildi qosymsha onlain BKM men pos-terminaldardyń tegin balamasy retinde jumys istemek. Oǵan qosa jańa júie onlain tirkeýge turý, onlain túrde salyq boiynsha esep tapsyrý jáne salyq tóleý syndy fýnktsiialardy qamtymaq», delingen habarlamada.
Qazirgi tańda onlain baqylaý-kassalyq mashinasy salyqtyq ákimshilendirýdiń negizgi tetigi bolyp otyr. Onlain baqylaý-kassalyq mashinasynan alynǵan derekter Memlekettik kirister komitetine taýarlar men qyzmetter úshin tólengen qarajatqa saraptama jasaýǵa múmkindik beredi.
«Onlain túbirtekter aýqymdy derekter qoryn jinaityndyqtan, Memlekettik kirister komitetiniń aqparattyq júiesin barlyq saýda núktelerimen integratsiialaý tiimsiz. Sondyqtan fiskaldy derekterdi qabyldaý, saqtaý jáne MKK aqparattyq júiesine joldaý fýnktsiiasyn fiskaldyq derekter operatory arqyly júzege asyrý týraly sheshim qabyldanǵan. Mundai tájiribe álemniń ózge elderinde de keńinen qoldanylady. Al kórshiles Resei Federatsiiasyn mysalǵa alar bolsaq, onda fiskaldyq derekter ǵana emes, shot faktýralardyń aqparattyq júiesi de jeke menshik operatorlarǵa berilgen», delingen habarlamada.
Qazaqstanda 2014 jyldan bastap fiskaldyq derekter operatory retinde «Qazaqtelekom» AQ jumys istep kelgen. Al 2019 jyly bul qyzmetti básekelestik ortaǵa berý týraly sheshim qabyldandy. Osylaisha, qazirgi tańda fiskaldyq derekter operatory fýnktsiiasyn 4 zańdy tulǵa júzege asyrýda («Qazaqtelekom» AQ, «Transtelekom» AQ, «Kar-tel» JShS jáne «KazTransCom» JShS). Bul sharalar qyzmettiń qunyn tómendetip, sapasyn arttyrý maqsatynda qolǵa alynǵan. Búginde «Transtelekom» AQ qyzmet qunyn 1 400 teńgege deiin tómendetti.
«Onlain baqylaý-kassalyq mashinalaryn paidalaný otandyq IT salasyn damytýǵa úles qospaq. Búginde smartfondarda mobildi onlain baqylaý-kassalyq mashinalary qosymshasynyń birneshe túri bar. Olardyń keibiri aqysyz negizde jumys isteidi. QR QM mamandary mundai pilottyq jobalardyń múmkindikteri men qaýipsizdigin zertteýde», delingen habarlamada.
