Foto: gov.kz
Memlekettik satyp alý – jańashyldyqtardy, ozyq tehnologiialar men otandyq óndiristi ilgeriletýge yqpal etetin tiimdi tetik. Osyǵan orai QR Qarjy ministrligi óńirlerde «Memlekettik satyp alý týraly» Zańdaǵy negizgi ózgeristerdi túsindirýge arnalǵan biznes ókilderimen, memlekettik sektormen jáne azamattyq qoǵammen ókilderimen kezdesýler ótkizýdi jalǵastyryp keledi, dep habarlaidy Qarjy ministrligi.
Bul joly kezekti kezdesý Óskemende ótkizilip, Qarjy vitse-ministri Dáýren Keńbeil men Shyǵys Qazaqstan oblysy ákiminiń orynbasary Darhan Sapanov memlekettik satyp alý arqyly otandyq taýar óndirýshilerdi qoldaý túrleri týraly aityp berdi. Is-sharaǵa Shyǵys Qazaqstan men Abai oblystarynyń biznes qaýymdastyǵy, sondai-aq memlekettik organdardyń, biýdjettik uiymdardyń, ShOB pen «Atameken» UKP óńirlik filialynyń ókilderi qatysty.
Dáýren Maratuly aitqandai, Memleket basshysy Qazaqstan halqyna Joldaýynda otandyq biznestiń sapaly damýyn yntalandyryp, qoldaýdy tapsyrǵan bolatyn. Osy turǵydan alǵanda «Memlekettik satyp alý týraly» Zań atalǵan mindetti oryndaýdaǵy mańyzdy qural bolyp sanalady.
«Memlekettik satyp alýdyń ashyq jáne jaqsy uiymdastyrylǵan júiesi protsestiń barlyq múddeli tarabyna, onyń ishinde memlekettik sektorǵa, biznes pen azamattarǵa tiimdi. Óitkeni bul básekelestiktiń artýyna jáne kórsetiletin qyzmetter men taýarlardyń sapasyn jaqsartýda septigi zor. Mysaly, satyp alýǵa qatysýshylardyń biliktiligin arttyrý úshin tiisti bedeli bar óndirýshiler arasynda satyp alýdy júzege asyrý usynylady. Óndirýshi týraly aqparat túrli derekqorlardy paidalana otyryp qalyptastyrylady. Bul qyzmet kórsetýshilerdi avtomatty túrde tańdaýǵa kóshýge múmkindik beredi», dedi Qarjy vitse-ministri.
Budan basqa otandyq taýar óndirýshilerdi qoldaý maqsatynda Qarjy ministrligi tek shaǵyn jáne orta kásipkerlik sýbektilerinen satyp alynatyn taýarlardyń, jumystar men kórsetiletin qyzmetterdiń jekelegen tizbesin bekitti.
Zańnyń birneshe bólimi satyp alý protsedýrasyn jeńildetýge baǵyttalǵan, bul olardy qysqa merzimde ótkizýge múmkindik beredi. Budan bólek tapsyrys berýshilerdiń joǵary talaptardy belgileý faktilerin boldyrmaý maqsatynda qoldanystaǵy kameraldy baqylaýdy saqtaý josparlanǵan. Bul rette ýákiletti organ tarapynan satyp alý qorytyndylarynyń kúshin joiý quqyǵy alynyp tastalǵanyn aita keteiik.
Mundai kezdesýler ministrliktiń isker ortamen ózara is-qimyldy nyǵaitý men barlyq múddeli tarap úshin qoljetimdi aqparatty qamtamasyz etý jónindegi strategiiasynyń mańyzdy bóligi bolyp sanalady. Vedomstvo Qazaqstan ekonomikasyn damyta otyryp, memlekettik satyp alý júiesiniń tiimdiligin arttyrý men ózekti máselelerdi birlesip sheshý úshin kásipkerlermen, iri biznes ókilderimen jáne qoǵamdyq birlestiktermen júieli dialog ornatýdy jalǵastyryp keledi.
Is-sharadan keiin D.Keńbeil eki kásiporynǵa aialdady: Óskemen ónerkásip armatýra zaýyty men «Raýan» tigin kompaniiasy.
Óskemen ónerkásip armatýra zaýyty (ÓÓAZ) – munai jáne gaz qubyrlary, himiia jáne metallýrgiia kásiporyndary, energetika kesheni jáne TKSh kásiporyndaryna, sondai-aq munai salasyna arnalǵan jabdyqtar men qubyr armatýrasyn óndirýmen ainalysady. Zaýyttyń jobalyq qýaty jylyna 1834 tonna daiyn ónim shyǵarýǵa qaýqarly. Kásiporyn Qazaqstannyń kómirsýtegi sektorynyń iri kompaniialaryn: «Ózenmunaigaz» AQ, «Qazgermunai» BK JShS «Embimunaigaz» AQ, «Mańǵystaýmunaigaz» AQ, «QazTransOil» AQ, «SNPS-Aqtóbemunaigaz» AQ, «Qarajanbasmunai» AQ, «Qarashyǵanaq Petroliým Opereiting B. V.» ZT AQ, «MunaiTas Soltústik-Batys qubyr kompaniiasy» JShS, «Intergaz Ortalyq Aziia» AQ jáne basqalar uiymdardy jabdyqtarmen qamtamasyz etip keledi.
«Raýan» ÓKK» JShS – arnaiy kiim tigetin kásiporyn, sondai-aq Qazaqstandaǵy erekshe balalarǵa arnalǵan kiim shyǵaratyn jalǵyz óndirýshi bolyp sanalady. Munda tserebraldy sal aýrýy bar balalarǵa belsendi ómir saltyn júrgizýge kómektesetin beiimdelý zattary jasalyp, tigiledi. Ónimdi jasaý kezinde qoldanylatyn barlyq zat yńǵaily jáne erekshe balalardyń qajettilikterin eskeredi. Óskemen titan-magnii kombinaty «Raýan» ÓKK arnaiy kiimderin kóterme baǵamen alatyn tapsyrys berýshileriniń biri. Qazaqstandaǵy taǵy bir iri kásiporny úshin munda arnaiy kiim toptamasy jasalyp daiyndalǵan.
