QR Qarjy ministri Erulan Jamaýbaev biylǵy jeti aiynyń qorytyndysy boiynsha memlekettik biýdjettiń atqarylý kórsetkishteri jaiynda esep berdi, dep habarlaidy "Ult aqparat".
«Respýblikalyq biýdjetke kirister (transfertterdi esepke almaǵanda) 2 trln 714 mlrd teńge somasynda tústi nemese jospar 83,3 paiyzǵa atqaryldy. Kirister boiynsha jospardyń atqarylmaýy 544 mlrd teńgeni qurady. Negizgi atqarylmaý somalary qosylǵan qun salyǵy jáne korporativtik tabys salyǵyna tiesili boldy», - dedi ministr Úkimet otyrysynda.
Korporativtik tabys salyǵynyń atqarylmaýyna kelesi faktorlar áser etken:
- negizgi eksporttyq pozitsiialar boiynsha baǵanyń orta eseppen 16,1 paiyzǵa tómendeýi (shiki munaiǵa – 35,8%, myrysh - 21,5%, aliýminii - 12,7%, ferrohrom - 8,4%, mys - 8,5% jáne qorǵasyn - 9,8%), bul taý-ken sektoryndaǵy iri salyq tóleýshilerden túsetin túsimderdiń 42,6 paiyzǵa azaiýyna ákep soqtyrdy;
- 830 iri salyq tóleýshi boiynsha málimdelgen avanstyq tólemder somasynyń ótken jyldyń 7 aiymen salystyrǵanda 184,3 mlrd teńgege tómendeýi;
- ekinshi deńgeidegi bankterden túsetin túsimderdiń 30 mlrd teńgege azaiýy.
Qosylǵan qun salyǵy boiynsha jospardyń negizgi atqarylmaý sebepteri:
- 2019 jyldan edáýir aýyspaly debettik qaldyqtyń bolýyna bailanysty ótken jyldyń uqsas kezeńimen salystyrǵanda qosylǵan qun salyǵyn qaitarýdyń 84,4 paiyzǵa ósýi;
- «Elektrondyq shot-faktýralar» AJ derekteri boiynsha satý boiynsha ainalymdardyń 12,4 paiyzǵa azaiýy. Negizgi tómendeý taý-ken ónerkásibi salasyna tiesili, onda ainalymdar 2019 jyldyń uqsas kezeńimen salystyrǵanda 34,4 paiyzǵa nemese 3,5 trln teńgege tómendegen.
- karantin rejimi engizilýine bailanysty iskerlik belsendiliktiń tómendeýi shamamen 19,3 myń salyq tóleýshi tólemderin 187 mlrd teńgege tómendetti;
- Qazaqstan Respýblikasynyń úshinshi eldermen taýar ainalymy 9,1 paiyzǵa, onyń ishinde maýsym aiynda 23,6 paiyzǵa tómendeýi jáne Qytai Halyq Respýblikasynan taýarlar importtaityn kólik quraldarynyń sany 16,7 paiyzǵa tómendeýi tirkeldi.
