QR Qarjy ministri Álihan Smaiylov biýdjet qarajatyn igermei jatqan memlekettik organdar men ulttyq holdingterge, kompaniialarǵa qatysty tiisti sharalar qabyldaýdy usyndy, dep habarlaidy QazAqparat tilshisi.
Respýblikalyq biýdjettiń shyǵystary 7 trln 092 mlrd teńgeni quraǵan.
«1 qyrkúiektegi jaǵdaimen salystyrǵanda, biýdjet qarajatyn igerý kórsetkishi jaqsardy. 6,5 mlrd teńgelik únemdeý somasyn eseptemegende, 47,1 mlrd teńge igerilmedi. Bul 8 aidaǵy kórsetkishten 33 mlrd teńgege az (80,1 mlrd teńge-avt.)», - deidi Álihan Smaiylov.
Ministr baiandamasynda atap ótkendei, naqtylanǵan respýblikalyq biýdjettiń jobasynda jyl basynan beri igerilmei kelgen biýdjettik baǵdarlamalardyń biraz qarajaty ońtailandyrylǵan.
«Biýdjet qarajatynyń tiimdi paidalanýyn sipattaityn kórsetkishterdiń biri - kvazimemlekettik sektor sýbektileriniń shottaryndaǵy qaldyqtardyń kólemi. Olardyń kólemi 59,2 mlrd teńgeni quraidy. Ol jyl basynan salystyrǵanda 15 mlrd teńgege azaidy. Biraq aityp ótý qajet, 41,5 mlrd teńge ótken jyldardan beri igerilmei kele jatqan qaldyqtar», - deidi ol.
Álihan Smaiylov óz sózinde tiisti memlekettik organdar men ulttyq holdingterge, kompaniialarǵa qarajatty igerý boiynsha sharalar qabyldaýdy usyndy.
«Jergilikti biýdjetterdiń shyǵysy 3 trln 496 mlrd teńgeni qurady. Atqarylmaǵany - 32 mlrd teńge. Bul ótkeng uqsas kezeńmen salystyrǵanda eki esege kem (2017 jylǵy 1 qazanda - 64 mlrd teńge). Neǵurlym kóp igerilmeý kelesi óńirlerde qalyptasty: Astana qalasy (4,9 mlrd teńge), Túrkistan (2,1 mlrd teńge), Qyzylorda oblystary (1,9 mlrd teńge), Almaty qalasy (1,4 mlrd teńge), Mańǵystaý oblysy (1,1 mlrd teńge).
Eń kóp igerilmeý sommalary kelesi ákimshilikterde: mádeniet jáne sport ministrligi, qorǵanys ministrligi, ulttyq qaýipsizdik komiteti, ulttyq ekonomika ministrligi jáne joǵarǵy sot», - deidi Qarjy ministri.
Eske sala ketsek, ótken aida QR Premer-Ministri Baqytjan Saǵyntaev biýdjet qarajatyn igere almaǵan birqatar ákimdi synaǵan edi.
