Senat tóraǵasy Máýlen Áshimbaev biýdjet qarjysyn ońdy-soldy shasha bermei, tiimdiligin arttyrýdy tapsyrdy, dep habarlaidy QazAqparat.
«Qazir bárimiz «Jańa Qazaqstandy» qurýǵa belsendi kirisip jatyrmyz. Bul jolda barlyq salada jańa qadam, tyń kózqaras qajet ekeni anyq. Sonyń ishinde respýblikalyq biýdjetti qalyptastyrýda da jańa tásilder kerek dep esepteimiz. Prezidentimiz aitqandai, Jańa Qazaqstan degenimiz – eń aldymen ádiletti Qazaqstan. Sol sebepti biýdjetti qalyptastyrý ashyq, ádil, tiimdi júrgizilýge tiis. Bul – halyqtyń talaby jáne Memleket basshysynyń bizge júktep otyrǵan basty mindeti», - dedi M. Áshimbaev Senattyń búgingi otyrysynda.
Osy rette bólinetin qarjynyń jáne josparlanǵan jumystyń naqty nátije berýi mańyzdy.
«Respýblikalyq biýdjettiń ár teńgesi ornymen bólinip, tiimdi jumsalýǵa tiis. Ulttyq qordyń da qarjysyn durys paidalanǵan jón. Biýdjet defitsitin syrttan qaryz alyp qarjylandyrý máselesin de pysyqtaǵan abzal. Qaryzdy kóbeite bermei, bar qarajatty durys paidalaný qajet. Sondyqtan biýdjetti qaraǵan kezde nátije bermeitin naýqandyq sharalardy qarjylandyrýǵa jol berilmeýi kerek. Bul máseleni depýttar baqylaýda ustaityn bolady. Qazir búkil álem tyǵyryqqa tirelip tur. Mundai sátte bar qarjyny ońdy-soldy shasha bermei, respýblikalyq biýdjettiń tiimdiligin arttyrýymyz kerek. Úkimet múshelerinen, ákimder men basqa da laýazymdy tulǵalardan aldaǵy ýaqytta osy máselelerdi eskerýdi suraimyz», - dedi Senat tóraǵasy.
Aita keteiik, búgin Senat otyrysynda depýtattar «Qazaqstan Respýblikasynyń Ulttyq qorynan 2022–2024 jyldarǵa arnalǵan kepildendirilgen transfert týraly» QR Zańyna ózgeris engizý týraly» jáne «2022–2024 jyldarǵa arnalǵan respýblikalyq biýdjet týraly» QR zańyna ózgerister men tolyqtyrýlar engizý týraly» zańdardy qarap, maquldady.
Bul túzetýler aiasynda sáýir aiynan bastap zeinetaqy men áleýmettik tólemder qosymsha 4 paiyzǵa artady. Jalpy zeinetaqynyń ortasha mólsheri ótken jylmen salystyrǵanda 11 paiyzǵa ósedi.
