Qazaqstandyq kásipqoi boksshy Batyr Júkembaev karerasynda alǵash ret nokdaýnǵa túskennen keiin bokstan ýaqytsha shettetildi. Ol birinshi raýndta nokdaýnǵa túskenine qaramastan qarsylasyn nokaýtqa túsirip jeńiske jetti, dep habarlaidy Sputnik agenttigi Vesti.kz saityna silteme jasap.
Kanadanyń Kvebek provintsiiasynyń boks komissiiasy qazaqstandyq Batyr Júkembaevty ýaqytsha bokstan shettetý týraly sheshim qabyldady.
Bul shettetý boksshynyń alǵan jaraqatynan keiin qalypqa kelip alýy úshin jasaldy. 27 qazannan bastap Batyr Júkembaev qaitadan sharshy alańda judyryqtasa alady. Qazaqstandyqtyń kelesi jekpe-jegi 24 qarasha kúni Kanadanyń Rimýski qalasynda ótedi. Alaida boksshynyń qarsylasy kim bolatyny ázirge belgisiz.
Esterińizge sala ketsek, Júkembaev sońǵy ret 7 qazan kúni judyryqtasty. Kanadanyń Kvebek qalasynda ótken boks keshinde qarsylasy meksikalyq Patrisio Moreno boldy.
Osy jekpe-jek barysynda qazaqstandyq alǵashqy raýndta nokdaýnǵa túskenimen, jetinshi raýndtyń sońyna qarai qarsylasyn nokaýtqa jiberdi. Bastapqyda bul jekpe-jekte bos turǵan WBC International belbeýi tigiletini týraly aitylǵan-dy. Alaida keiin uiym buǵan ruqsat bermedi.
