Óskemen qalasynda 8 jastaǵy qyz jalǵyz ózi jabyq jertólede qalyp qoiǵan, dep habarlaidy "Ult aqparat".
ShQO Tótenshe jaǵdailar departamenti baspasóz qyzmetiniń málimetinshe, 10 tamyzda Kúlenov kentindegi Halyqtar dostyǵy kóshesinde ornalasqan jertólede oinap júrgen kishkentai qyz esikti jaýyp alyp, qamalyp qalǵan. Ata-analary qutqarýshylarǵa qońyraý shalyp, kómek surady.
«Departamenttiń mamandandyrylǵan jasaǵy oqiǵa ornyna jyldam kelip jetti. Olar arnaiy qural-saimandardyń kómegimen jertóledegi temir tordy bólshektep, sol arqyly ishke kirdi de esikti ashty. 8 jastaǵy qyzdyń densaýlyǵyna eshqandai qaýip tónip turǵan joq», - dep habarlady vedomstvo ókilderi.
Osy rette, oblystyq TJD mamandary óńir jurtshylyǵyna balalardy qaraýsyz qaldyrmaý qajettigin eskertedi.
