Foto ashyq derekkózden alyndy
Álemniń myqty shahmatshylarynyń biri, 16-shy álem chempiony Magnýs Karlsen Qatar Masters týrnirinde 23 jastaǵy qazaqstandyq Álisher Súleimenovten kútpegen jerden jeńilip qaldy, dep habarlaidy Sputnik Qazaqstan.
"Oiyn barysynda eseńgirep otyrdym. Men qarsylasymdy eshnársege kinálaǵym kelmeidi, ol tańǵajaiyp oiyn kórsetti jáne jeńiske laiyq boldy, biraq oiyn basynda qarsylasymnyń saǵatyn kórip, kontsentratsiia jasaý qabiletimdi joǵaltyp aldym", - dep málimdedi Magnýs Karlsen Twitter-de.
"Bul oimen durys kúrese almaǵanym úshin jaýapkershilikti óz moinyma alamyn, biraq uiymdastyrýshylardyń alaiaqtyqpen kúresýge áli de baiyppen qaramaitynyn kórip qatty qynjyldym: transliatsiiaǵa eshqandai shekteý joq, kórermender oiyn zalynda smartfonmen júr", - dep atap ótti norvegiialyq.
Álisher Súleimenovpen oiyn barysynda Karlsen, tipti, tóreshiden saǵat taǵýǵa ruqsat bar ma dep suraǵan, oǵan "aqyldy" saǵattarǵa ǵana tyiym salynǵanyn aitqan. Karlsen bul jaǵdai joǵary deńgeidegi jarystar úshin FIDE erejelerine qaishy keledi dep esepteidi.
Janjal buqaralyq aqparat quraldarynda qarqyn alǵan soń, birneshe saǵattan keiin Karlsen taǵy bir jazba shyǵardy: "Men qarsylasymdy alaiaqtyq jasady dep aiyptap jatqan joqpyn. Meniń atymdy aiǵai-shý úshin qoldanyp jatqany anyq, biraq bul - jaǵymsyz nárse".
Magnýs Karlsen bir jyl buryn da janjal shyǵarǵan: ol 19 jastaǵy amerikalyq Hans Nimannan jeńilip, týrnirden shyǵyp qaldy. Oǵan kompiýterdiń keńesin paidalandy dep tikelei aiyp taqty.
Niman eshqashan qýlyq istemegenin aityp, Magnýs Karlsenge qarsy 100 million dollarǵa sotqa shaǵym túsirdi. Keiinirek qarsylastar kelisimge keldi.
