1997 jyldyń qytymyr qysynda, qańtardyń qaqaǵan aiazynda Kókshetaý qalasynda jylý qazany jarylyp, sý qatyp, adamdar búrseń qaǵyp qalǵan edi. Sol sumdyq bul qalanyń tarihyna óshpes ókinishtei bolyp jazyldy.
Sodan beri 20 jyl ótse de kókshetaýlyqtar qylyshyn súiretip qys kelgende sýyq qatty bolsa taǵy da qazandyǵymyz jarylyp, jylýsyz qalmas pa ekenbiz degen ǵariptikten aryla almai keledi. Óitkeni, Kókshetaý Jylý elektr ortalyǵy (JEO) joq jalǵyz oblys ortalyǵy, munda jylýdy jergilikti qazandyq beredi. Qazir sol qazandyqtyń qýaty taýsylyp, barlyq resýrstary bitip, aýystyrýdy qajet etip otyr. Munda 20 jyl boiy aýysqan birde-bir ákimniń qarymy JEO salýǵa jetpedi. Tek bir-aq jyl ákim bolǵan Qairat Qojamjarov qana bul isti qolǵa alǵan edi. Ony tipti Prezident N.Nazarbaev ta qoldaǵan. Biraq odan keiin ákim bolǵandar bul isti jalǵastyra almai, Energetika ministrliginiń vedomstvolyq múddesinen shyǵa almai, jobany japty.
Alaida Kókshetaýda JEO salý jobasyn iske asyrýǵa atsalysamyz dep Qytai men Resei túgil Germaniia, Ulybritaniia, Izrail siiaqty elderden delegatsiialar kelgen. Ásirese, elimizde kóptegen jobalardy, sonyń ishinde Aqtaýdaǵy bitým zaýytyn, 1 myń shaqyrymǵa jýyq avtojoldar salýdy iske asyrǵan Qytaidyń «CITIC CONSTRUCTION Co. Ltd» degen kompaniiasy usynyp otyrǵan jobanyń qarajaty da, tehnikalyq qýaty da, ekologiialyq tazalyǵy da dittegen jerden shyǵyp tur. Tek sony qoldap, iske kirisý kerek. Ony iske asyratyn qarajat kózderin de tabýǵa bolady. Tipti, QHR Tóraǵasy Si Tszinpinniń ótken jyly Astanaǵa kelgen sapary aiasynda qol qoiylǵan ekonomikalyq yntymaqtastyq kelisimsharttary arasynda osy joba da bolǵan. Endi sol sharýany iske asyrý tek Qazaqstan Úkimettiń aldynda tur.
Májilis depýtaty Aiqyn Qońyrov osy máseleniń bárin egjei-tegjeili aityp, Úkimet Basshysy Baqytjan Saǵyntaevtyń atyna depýtattyq saýal joldap, jobany iske asyrýdy usyndy. Endigi sóz Úkimet Basshysynda. Kókshetaýdy ǵariptikten qutqarý sol kisiniń qolynda.
S.ELEÝ, sarapshy
