Almatyda nájisti káriz qudyǵyna tókken assenizator júrgizýshisi jazalandy, dep habarlaidy QazAqparat.
Alataý aýdanyna qarasty «Aqbulaq» yqshamaýdanynyń turǵyndary abattandyrý erejesiniń buzylǵanyna bailanysty politsiiaǵa aryz túsirdi.
«Tiisti tekserý júrgizildi. Nátijesinde assenizator júrgizýshisi – 1973 jyly týǵan Sembekov anyqtaldy. Bul áreketi úshin ol QR Ákimshilik quqyq buzý kodeksiniń 505-baby boiynsha ákimshilik jaýapqa tartyldy. Oǵan 30 AEK (87 510 teńge) kóleminde aiyppul salyndy», - dep jazdy Facebook paraqshasynda Almaty qalalyq politsiia departamenti bastyǵynyń orynbasary Rýstam Ábdirahmanov.
Quqyq buzýshy Jarbulaq (Kazachka) ózenine sarqyn sýdy zańsyz aǵyzýdy anyqtaý úshin ótkizilgen reid kezinde ustaldy.
