Jer qatynastary máselesi - Ulttyq qoǵamdyq senim keńesiniń kún tártibinde basty oryndardyń birinde. Bul týraly QR Prezidentiniń kómekshisi Erlan Qarin Telegram paraqshasynda jazdy, dep habarlaidy "Ult aqparat".
«2021 jyly 25 aqpanda Ulttyq qoǵamdyq senim keńesinniń besinshi otyrysynda Memleket basshysy aýylsharýashylyq maqsatyndaǵy jerlerdi sheteldikterge jáne sheteldik zańdy tulǵalarǵa satýǵa jáne jalǵa berýge tyiym salýdy zańmen bekitýdi tapsyrdy. Sonymen birge, Qasym-Jomart Toqaev Prezidenttiń zańnamalyq bastamasy aiasynda zań jobasyn daiyndaý qajettiligine nazar aýdardy. Ulttyq keńes otyrysynan keiin Prezident Ákimshiligi birden tiisti jumystardy bastady. Zań jobasy tezirek daiyndalyp, maquldandy», - dep jazdy Erlan Qarin.
Ol osynyń nátijesinde keshe Qazaqstan Respýblikasy Konstitýtsiiasynyń 61-babynyń 1-tarmaǵyna sáikes Memleket basshysy Qazaqstan Respýblikasy Parlamenti Májilisine jerdi sheteldikterge satýǵa jáne jalǵa berýge tyiym salýdy qarastyratyn «Qazaqstan Respýblikasynyń keibir zańnamalyq aktilerine jer qatynastary máseleleri boiynsha ózgerister men tolyqtyrýlar engizý týraly» Qazaqstan Respýblikasy zańynyń jobasyn joldaǵanyn aitty.
«Jer qatynastary máseleleri Ulttyq keńestiń alǵashqy jumys kúninen bastap kún tártibindegi basty orynnyń birin ielengenin atap ótken jón. Sondyqtan, Prezidenttiń aýylsharýashylyq jerlerin sheteldikterge satýǵa jáne jalǵa berýge tyiym salý týraly sheshimi UQSK alańynda jariialandy. Bul taǵy da osy dialog alańynyń ózektiligi men tiimdiligin kórsetedi», - dedi ol.
Eske sala ketsek, buǵan deiin Memleket basshysy Qasym-Jomart Toqaev jerdi sheteldikterge satýǵa birjola tyiym salýdy kózdeitin zań jobasyn Májiliske joldaǵan edi.
