Búgin Memleket basshysy Qasym-Jomart Toqaev «Qazaqstan Respýblikasyndaǵy sailaý týraly» Qazaqstan Respýblikasynyń Konstitýtsiialyq zańyna ózgerister men tolyqtyrýlar engizý týraly» zańǵa qol qoidy. Bul – óte mańyzdy qujat.
Bul týraly QR Prezidentiniń keńesshisi Erlan Qarin óziniń Facebook paraqshasynda jazdy, dep habarlaidy QazAqparat.
Onyń sózinshe, endi, elimizdegi sailaý júiesi jańa talaptar boiynsha jumys isteidi. Aýdandyq deńgeidegi qalalardyń, aýyldardyń, kentterdiń jáne aýyldyq okrýgterdiń ákimderin sailaý – jergilikti jerdegi memlekettik basqarýǵa halyqtyń tikelei qatysýyn qamtamasyz etý jolynda jasalǵan biregei qadam. Biyl osy zań boiynsha 800-den astam eldi-mekende ákimder sailaýy ótedi.
Sonymen birge, saiasi partiialardyń Parlament pen máslihatqa ótýine qoiylǵan 7 paiyzdyq shek 5 paiyzǵa deiin tómendetildi. Atalǵan sheshim saiasi básekeni kúsheitip, sailaý úderisine tyń serpin bereri sózsiz.
Oǵan qosa, budan bylai sailaý biýlletenderine «bárine qarsy» degen baǵan engiziledi. Bul sailaýshylardyń tańdaý quqyǵyn tolyq júzege asyrýǵa múmkindik beredi.
«Osylaisha, Prezidenttiń bastamasymen qolǵa alynǵan saiasi reformalardyń birinshi, ekinshi jáne úshinshi toptamasynda kózdelgen negizgi usynystar zań normalaryna ainalyp, iske asty. Munyń bári Ulttyq qoǵamdyq senim keńesi aiasynda kóterilip, pysyqtalǵanyn bilesizder.
Shyn máninde, bul – Memleket basshysy basa mán berip otyrǵan Qazaqstandaǵy saiasi dialogtyń naqty jemisi»,-dep jazdy Erlan Qarin.
