Prezidenttiń kómekshisi Erlan Qarin Prezidenttik jastar kadr rezervine ekinshi irikteý bastalǵanyn habarlap, ondaǵy jańa talaptardy atady, dep habarlaidy "Ult aqparat".
Erlan Qarin Telegram-daǵy paraqshasynda jýyqta Prezidenttik jastar kadr rezervine ekinshi qabyldaý bastalatynyn jazdy.
Aitýynsha, búgin Memleket basshysy «Prezidenttik jastar kadr rezerviniń keibir máseleleri týraly «Qazaqstan Respýblikasy Prezidentiniń 2019 jylǵy 27 tamyzdaǵy № 141 Jarlyǵyna ózgerister engizý týraly» Jarlyqqa qol qoiǵan.
«Rezervke ekinshi irikteýge 35 jasqa deiingi, joǵary bilimi bar jáne eńbek ótili 5 jyldan kem bolmaityn jastar qatysa alady. Sondai-aq, jańa irikteý sheńberinde úmitkerlerdiń memlekettik tildi orta deńgeiden (V1) tómen emes deńgeide meńgergeni týraly sertifikattyń bolýy týraly talap engizildi», - dedi Prezidentiń kómekshisi.
Onyń jazbasynda aitylǵandai, kandidattardy irikteý arnaiy aqparattyq júie arqyly birneshe kezeńde júrgiziledi:
1. Qujattardy qabyldaý (onlain);
2. Mátindik jáne sandyq aqparatpen jumys isteý qabiletin baǵalaý (onlain);
3. Sitýatsiialyq tapsyrmalardy sheshý (onlain);
4.Quzyretterdi baǵalaý (oflain);
5. Saraptamalyq komissiiada kandidattarmen áńgimelesý (onlain);
6. Ulttyq komissiianyń otyrysynda qaraý (aldyn ala onlain).
Úmitkerler rezervke 3 jylǵa qabyldanady.
«Búgingi tańda Prezidenttik jastar kadr rezerviniń alǵashqy leginen shyqqan 179 jas maman memlekettik organdar men kvazimemlekettik kompaniialarǵa qyzmetke taǵaiyndaldy. Osylaisha, Prezidenttik Jastar kadrlyq rezervi óziniń basty mindeti – jas mamandar úshin tiimdi áleýmettik lift qurý mindetin iske asyrýda», -dep jazdy Erlan Qarin.
