Prezidenttiń kómekshisi Erlan Qarin Telegram kanalynda 700-den astam aýyldyń ákimi bir ýaqytta sailaýǵa túsetinin jazdy, dep habarlaidy "Ult aqparat".
«Prezident bastamashy bolǵan saiasi reformalardyń ekinshi jáne úshinshi paketin is júzinde júzege asyrý bastaldy. Elimizdiń birqatar óńirinde aýyldyq okrýg ákimderin sailaý kúni belgilengen. 25 shildede bir mezgilde 700-den astam aýyl ákimderin sailalanady. Qalǵan ákimderdi sailaý olardyń ókilettik merzimi aiaqtalǵannan keiin ótkiziledi», - dep jazdy Erlan Qarin.
Prezident kómekshisi atalǵan túiindi bastamanyń iske asýyn saiasi jańǵyrýdyń jańa kezeńin aiǵaqtaityn óte mańyzdy oqiǵa retinde baǵalap otyr.
«Aýyl ákimderiniń tikelei sailaýyn ótkizý jónindegi bastamany alǵash ret Memleket basshysy 2020 jylǵy 1 qyrkúiekte óziniń Joldaýynda aitqan bolatyn. Al 2021 jyldyń 24 mamyrynda Prezident Qasym-Jomart Toqaev zańnamaǵa aýyl ákimderin tikelei sailaýdy engizýge múmkindik beretin túzetýlerdi kózdeitin zańnamalyq aktilerge qol qoidy. 5 maýsymnan bastap sailaý zańnamasynyń jańa normalary kúshine endi. Nátijesinde bir jyldan az ýaqyt ishinde bul bastama júzege asyryldy», - deidi Memleket basshysynyń kómekshisi.
Onyń aitýynsha, Qasym-Jomart Toqaev bastamashy bolǵan saiasi reformalardyń aiasynda búginniń ózinde 10 zań qabyldanǵan.
Jyl sońyna deiin bul baǵytta taǵy birqatar zań qabyldaý josparlanyp otyr.
