Memleket basshysynyń Prezident sailaýyn 20 qarashaǵa belgileý týraly jarlyǵy jańa elektoraldy tsikldy bastap berdi. Memlekettik keńesshi Erlan Qarin telegram kanalynda saiasi naýqan týraly oi bólisti, dep habarlaidy QazAqparat.
«Prezident sailaýyn ótkizý týraly bastama keiingi úsh jyldaǵy saiasi jańǵyrý baǵytyna tolyqqandy sai keledi. Konstitýtsiialyq reforma bilik tarmaqtary arasyndaǵy ózara qarym-qatynastyń jańa, neǵurlym teńdestirilgen tártibin bekitti. Jańa úlgini iske qosý úshin memlekettiń Prezident, Parlament, Úkimet, máslihattar siiaqty sheshýshi institýttaryn qosa alǵanda búkil saiasi júieni qaita bastaý qajet», - deidi Memlekettik keńesshi.
Sondai-aq, bul rette sarapshylar men saiasat mańy ortalarynda aldaǵy elektoraldy naýqan týraly pikirtalas kópten beri órbip kele jatqanyna nazar aýdarady. Sarapshylardyń birqatary merzimnen buryn sailaý ótkizý qajettigi týraly kóktemde aitqanyna toqtalady.
«Qazirgi sailaýdyń ereksheligi – aldaǵy sailaý naýqany kestesiniń aldyn ala jariia etilýinde bolyp otyr. Qasym-Jomart Toqaev Prezident sailaýy týraly tiisti jarlyqqa qol qoiǵannan bir ai buryn qulaqqaǵys etti. Al buǵan deiin merziminen buryn ótken sailaýlardyń barlyǵy olardyń kúni kórsetilgen jarlyqqa qol qoiylǵan kúni málim bolyp kelgen edi. Bul ýaqyt aldaǵy naýqannyń qoǵamda keńinen talqylanýyna ǵana emes, áleýetti qatysýshylardy aldyn ala daiyndaýǵa da jetkilikti boldy. Zań boiynsha sailaý kúni belgilengennen keiin eki ai ishinde ótedi, biraq is júzinde naýqan úshi aiǵa sozylady.
Qoǵamnyń birligi, memlekettiń turaqtylyǵy, eldiń kez kelgen ishki jáne syrtqy máselelerge durys jaýap bere alý qabileti tek qana teńdestirilgen jáne turaqty saiasi júie jaǵdaiynda ǵana qamtamasyz etiledi. Sondyqtan, geostrategiialyq týrbýlenttik ýshyǵa túsken kezde aldaǵy Prezident sailaýy bizdiń elimizdi keń kólemdi áleýmettik-ekonomikalyq reformalar dyń jańa kezeńi qarsańynda biriktiretin eń mańyzdy faktorǵa ainalýy tiis», - deidi Erlan Qarin.
