Keshe Memleket basshysy Qasym-Jomart Toqaev Ulttyq qoǵamdyq senim keńesin qurý týraly jarlyqqa qol qoidy. Prezident keńesshisi Erlan Qarin mundai keńes qurýdyń mańyzdylyǵy týraly telegramm kanalynda jazdy, dep habarlaidy Baq.kz agenttigi.
Aitýynsha, Qasym-Jomart Toqaev mundai keńes qurý týraly alǵash ret mamyr aiynyń basynda aitqan.
«Prezidenttiń eń birinshi sheshimderiniń biri Ulttyq qoǵamdyq senim keńesin qurý týraly jarlyqqa qol qoiý boldy. Prezident mundai dialogtyq alań qurý ideiasy týraly alǵash ret mamyr aiynyń basynda óziniń senimdi tulǵalarymen kezdesýinde aitqan jáne bul onyń sailaý aldy baǵdarlamasyndaǵy basym bastamalardyń biri bolatyn», - dep jazdy Qarin.
Sonymen qatar, prezident keńesshisi qoǵammen dialog qurý – Qasym-Jomart Toqaev saiasatyndaǵy basty baǵdary ekenin atap ótti.
«Prezident qyzmetine kirisken soń birden Ulttyq keńes qurý týraly jarlyqqa qol qoidy. Bul – onyń birinshi sheshimi jáne ulyqtaýdan keiingi birinshi jarlyǵy. Osylaisha prezident óz saiasatyndaǵy basty baǵdar retinde dialog qurýdy belgiledi. Munymen birge, prezident Ulttyq keńesti qurýda azamattyq qoǵam ókilderiniń oiyn eskerýdi mańyzdy dep esepteidi. Sondyqtan Jarlyqta Prezident ákimshiligine bir ai ishinde saiasi partiia, úkimettik emes uiymdardyń basshylarymen Keńes quramyn jáne onyń jumys formatyn qurý máselesi boiynsha keńes ótkizý týraly airyqsha atap ótti», - dep jazdy Prezident keńesshisi.
