Prezident kómekshisi Erlan Qarin «Habar-24» arnasyndaǵy «Suhbat» baǵdarlamasynda biyl tuńǵysh ret ótetin ákimder sailaýyn jańa betburysqa teńedi, dep habarlaidy QazAqparat.
«Bilesizder, biyl Prezidenttiń bastamasymen elde tuńǵysh ret aýyl ákimderiniń tikelei sailaýy ótedi. Osy sailaýǵa bailanysty birneshe zańǵa ózgerister engiziledi. Sol ózgeristerdi qamtityn zań jobalary kúni keshe Májiliske kelip tústi. Endi soǵan sáikes Májiliste osyndai talqylaýlar ótedi. Osynyń bárin biz de óz tarapymyzdan baqylap, qadaǵalap otyramyz. Qandai talqylaý boldy, qandai qosymsha usynys aitylady degen siiaqty», - dedi Memleket basshysynyń kómekshisi.
Suhbat barysynda Prezident kómekshisi atalmysh sailaýdy eldiń saiasi damýyndaǵy úlken betburysty oqiǵa dep sanaitynyn jetkizdi.
«Atalyp otyrǵan ózgeristerdiń bári – úlken betburysty ózgerister. Mysalǵa biyl birinshi ret ótkizileiin dep otyrǵan aýyl ákimderiniń tikelei sailaýy arqyly 800-ge jýyq aýyl ákimi anyqtalady. Buryn janama túrde sailanǵan aýyl ákimderiniń ókilettigi toqtaidy. Soǵan sáikes, endigi ákimder tikelei sailaý arqyly sailanady. Bul da elimizdiń saiasi damýyndaǵy úlken bir aitýly oqiǵa, jańa bir kezeń. Sebebi bizdiń halyq óziniń ákimderin tikelei sailap, sol arqyly ózderiniń saiasi quqyqtaryn keń aýqymda júzege asyrýdyń taǵy bir qosymsha múmkindigine ie bolady», - dedi Erlan Qarin.
