Prezidenttiń kómekshisi Erlan Qarin keshegi ótken ákimder sailaýynyń strategiialyq mańyzdylyǵy týraly pikir bildirdi, dep habarlaidy QazAqparat.
«Óńirlik aqparat resýrstarynda el tarihynda alǵash ret ótken aýyl ákimderi sailaýynyń alǵashqy nátijeleri jariialana bastady. Bul mańyzdy oqiǵany áýel bastan kóptegen sarapshylar nazarda ustady. Sondyqtan, osy sailaýdyń qorytyndylaryn sarapshylar egjei-tegjeili zerdelep, nátijesi otandyq aqparat quraldarynda jan-jaqty baiandalatynyna senimdimin», - dep jazy ol Telegram paraqshasynda.
Erlan Qarin atalmysh saiasi naýqannyń strategiialyq mańyzdylyǵyna aiǵaq bolatyn birneshe jaitty atady.
«Birinshiden, bul sailaý jergilikti memlekettik basqarý júiesinde eleýli institýtsionaldyq ózgeristerdi bastady. Olar keleshekte memleket pen qoǵam arasyndaǵy ózara qarym-qatynasyn baiyppen aiqyndaityn sapaly jańa ortanyń negizin qalaidy.
Ekinshiden, beibit jiyndar týraly jańa zańdy qabyldaýmen, sailaý jáne saiasi partiialar týraly zańnamany jetildirýmen qatar, ákimderdiń tikelei sailanbalylyǵyn engizý qazaqstandyqtardyń saiasi mádenieti men saiasi belsendiligin arttyrýǵa yqpal etedi», - dedi Erlan Qarin.
Onyń aitýynsha, bul sailaý Prezident belgilegen memlekettik qyzmetshilerdiń jańa býynyn dáiekti qalyptastyrýǵa, memlekettik apparat jumysyndaǵy tásilderdi zaman talabyna sai jetildirýge baǵyttalǵan.
«Osy turǵydan alǵanda keshegi sailaý aýyl ákimderi korpýsynyń aitarlyqtai jańarýyna, memlekettik qyzmetke jańa tulǵalardyń kelýine yqpal etedi. Osynyń barlyǵy jiyntyǵynda jergilikti memlekettik basqarý júiesiniń odan ári damýyna oń serpin beredi. Jalpy, bul sailaý Memleket basshysynyń júieli saiasi ózgeristerdi júzege asyrýǵa baǵyttalǵan baǵytynyń dáiektiligin taǵy da rastady. Sol arqyly Prezidenttiń barlyq bastamalary men sheshimderi qoǵamda keń qoldaý taba otyryp, kezeń-kezeńmen iske asyp jatqanyn kórsetti. Tek saiasi reformalar boiynsha ǵana Prezidenttiń bastamasymen eki jyl ishinde 10 zań qabyldandy. Taǵy birneshe zań jobasy túrli satyda qaralyp jatyr», - dep túiindedi Erlan Qarin.
