Ulttyq qaýipsizdik komitetiniń eks-tóraǵasy Kárim Másimovti qamaýǵa alý merzimi bir aiǵa uzartyldy, dep habarlaidy Sputnik Qazaqstan.
UQK baspasóz qyzmetiniń habarlaýynsha, Kárim Másimov pen Ánýar Sadyqulovty qamaýda ustaý merzimi 6 maýsymǵa deiin, al Dáýlet Erǵojindi qamaý merzimi 13 maýsymǵa deiin uzartyldy.
"UQK-niń jedel tergeý toby Másimov, Sadyqulov, Erǵojin jáne basqa da tulǵalarǵa qatysty Qazaqstan Qylmystyq kodeksiniń 175-baby 1-bóligi, 179-baby 3-bóligi, 218-baby 3-bóligi 3-tarmaǵy, 362-baby 4-bóligi 3-tarmaǵy, 366-baby 4-bóliginde kózdelgen qylmys belgileri boiynsha qylmystyq isti tergeýdi jalǵastyryp jatyr", - delingen UQK jaýabynda.
Sondai-aq UQK tóraǵanyń eks-orynbasary Marat Osipovty qamaýǵa alý merzimi 2022 jyldyń 22 mamyryna deiin uzartylǵanyn habarlady.
"Jasalǵan qylmystardyń mán-jaiy men aýyrlyǵyn, sondai-aq bul adamdar isti obektivti tergeýge kedergi keltirýi múmkin dep paiymdaýǵa jetkilikti negizderdiń bolýyn eskere otyryp, qamaýda ustaý bultartpaý sharasyn qoldaný jáne keiinnen uzartý týraly sheshim qabyldandy", - delingen komitettiń habarlamasynda.
Aita keteri, Qylmystyq is júrgizý kodeksiniń 151-babyna sáikes, atalǵan qylmys sanattary boiynsha qamaýǵa ustaý merzimi 18 aidan aspaýy kerek.
Eske sala keteiik, 6 qańtarda UQK memlekettik opasyzdyq faktisi boiynsha sotqa deiingi tergeýdi bastady – Kárim Másimov pen onyń Samat Ábishten basqa barlyq orynbasary ustalyp, ýaqytsha ustaý izoliatoryna qamaldy.
