Bas prokýror Berik Asylov Ulttyq qaýipsizdik komitetiniń burynǵy tóraǵasy Kárim Másimov qansha jylǵa sottalýy múmkin ekenin aitty, dep habarlaidy "Ult aqparat".
Májilistiń jalpy otyrysynda depýtat Natalia Dementeva Bas prokýrordan «Áleýmettik jelilerde depýtattarǵa halyqtan kóptegen suraq kelip jatyr. Sońǵy kúnderdegi eń ózekti suraqtardyń biri - "Eger Kárim Másimovtiń jáne Ulttyq qaýipsizdik komitetiniń basqa qyzmetkerleriniń kinási dáleldense, olar qandai jazaǵa taratylýy múmkin?" Soǵan bailanysty qylmystyq is qai kezeńge keldi?», - dep surady.
Asylovtyń aitýynsha, ulttyq qaýipsizdik komitetiniń eks-basshysy jáne onyń orynbasarlary 17 jylǵa sottalýy múmkin.
«Másimov, onyń úsh orynbasary jáne eki bólimshe bastyǵyna qatysty birneshe is qozǵalyp, tergelip jatyr. Sonyń ishinde memleketke opasyzdyq jasaý, bilikti kúshpen basyp alýǵa árekettený, bilikti asyra paidalaný jáne para alý qylmystary bar. Burynǵy tóraǵa men onyń orynbasarlary qamaýda. Olardyń áreketterine quqyqtyq baǵany sot beredi. Biraq, aldyn ala aitar bolsaq, atalǵan qylmystar úshin Qylmystyq kodekspen 17 jylǵa deiin bas bostandyǵynan aiyrý qarastyrylǵan. Qazir tergeý áli júrgizilip jatyr», - dedi ol.
Aita keteri, Ulttyq qaýipsizdik komitetiniń burynǵy basshysy Kárim Másimov jappai tártipsizdikterden keiin 6 qańtarda qyzmetinen bosatyldy. 8 qańtarda onyń ustalǵany belgili boldy. Sondai-aq onyń eki orynbasary – Ánýar Sadyqulov ("A" arnaiy maqsattaǵy qyzmetiniń bastyǵy) men Dáýlet Erǵojin ustaldy. Artynan Másimovtyń taǵy bir orynbasary Marat Ósipov qamaýǵa alyndy. Al Qazaqstannyń eks-prezidenti Nursultan Nazarbaevtyń nemere inisi Samat Ábish qyzmetinen bosatyldy.
Basynda Qylmystyq kodekstiń úsh baby boiynsha tergeý bastalǵan. Kúdiktilerge memleketke opasyzdyq jasaý jáne bilikti kúshpen basyp alýǵa nemese Qazaqstannyń konstitýtsiialyq qurylysyn kúshtep ózgertýge baǵyttalǵan áreketterden basqa, "bilikti nemese qyzmettik ókilettikterdi asyra paidalaný" baby boiynsha aiyp taǵylyp otyr. Sosyn para alý faktileri boiynsha tergeý sharalary qolǵa alyndy.
Másimov premer-ministr laýazymynda bolǵanda biznes-qurylymnyń birinen astanada quny 2,5 milliard teńge turatyn elitalyq turǵyn úi men jer telimin aldy degen kúdikke ilindi. Onyń kottedjinen býma-býma dollar men qymbat kólikter tárkilendi.
