Madridtik "Real" fýtbol klýby men Frantsiia quramasynyń shabýylshysy Kárim Benzema 2021/2022 maýsymnyń qorytyndysy boiynsha "Altyn dopqa" ie boldy. Frantsiianyń France Football gazetiniń júldesi qazannyń 17-sinen 18-ine qaraǵan túni Parijde saltanatty túrde tapsyryldy.
Benzema XXI ǵasyrda, iaǵni 1998 jyldan beri "Altyn dopty" alǵash alǵan frantsýz fýtbolshysy atanyp otyr. 1998 jyly bul mártebeli syilyqty Zinedin Zidan alǵan.
Kárim byltyr "Real" sapynda Ispaniia chempiony jáne Chempiondar ligasynyń jeńimpazy bolǵan.
Sondai-aq, Benzemamen bir klýbta oinaityn Tibo Kýrtýa jyldyń úzdik qaqpashysyna beriletin Lev Iashin atyndaǵy syilyqpen marapattaldy.
Al "Barselonanyń" jartylai qorǵaýshysy Gavi jyldyń eń jas úzdik oiynshysy retinde tanylsa, byltyrǵa deiin "Bavariiada" oinap, biyldan bastap "Barselonaǵa" aýysqan shabýylshy Robert Levandovskii úzdik shabýylshy atandy.
Áielder arasyndaǵy "Altyn dopty" "Barselonanyń" jartylai qorǵaýshysy Aleksiia Pýtelias qatarynan ekinshi ret aldy. "Bavariia" oiynshysy Sado Mane qoǵamdyq isterdegi jetistigi úshin beriletin Sokrates atyndaǵy syilyqtyń tuńǵysh iegeri boldy.
Maýsymnyń úzdik komandasy ataǵyn Angliianyń "Manchester Siti" komandasy aldy.
Úzdik oiynshylardyń úshtigine Kevin de Briýine ("Manchester Siti") men Sado Mane ("Liverpýldegi" oiyny úshin) kirdi.
Sonymen qatar úzdik on oiynshy qataryna Erling Holand ("Manchester Siti"), Lýka Modrich, Vinisiýs Jýnior, Tibo Kýrtýa (úsheýi de "Real"), Kilian Mbappe ("PSJ"), Mohamed Salah ("Liverpýl"), Robert Levandovski ("Bavariia") qosyldy.
Fýtbol álemindegi asa tanymal oiynshylardyń biri, bes márte "Altyn dop" iegeri Krishtianý Ronaldý 20-shy orynǵa toqtady. "PSJ" shabýylshysy, jeti márte "Altyn dop" iegeri Lionel Messi biyl nominanttar tizimine kirmei qaldy.
Biyl "Altyn dop" alǵash ret jyl qorytyndysy boiynsha emes, maýsymdaǵy oiyn qorytyndysy boiynsha berildi.
